କ'ଣ ପାଇଁ
କ'ଣ ପାଇଁ
ପୁଅ ଝିଅ ପରା ସଭିଏଁ ସମାନ
ସରବେ ଈଶ୍ବର ଦାନ
କ'ଣ ପାଇଁ ଝିଅ ଅଲୋଡା ଅଖୋଜା
ହରାଏ ନିଜ ଜୀବନ ।
ଗରଭାବସ୍ଥାରୁ ମାରି ଦିଆଯାଏ
କ'ଣ ପାଇଁ ତା'କୁ କୁହ ?
ଗଢ଼ି ଜାଣିଥିଲେ ହୋଇବ ନାହିଁ କି
ପୁଅ ସମକକ୍ଷ ଝିଅ ?
ଅପ୍ରାପ୍ତ ବୟସ୍କା ହେଉ ଅବା ପ୍ରାପ୍ତ
ତା' ସହିତ ବ୍ୟଭିଚାର
କ'ଣ ପାଇଁ କରେ ମୂଢ଼ ପୁରୁଷଟେ
ନରଖି ମନେ ବିଚାର ।
ସେହି ସମୟରେ ନିଜ ମାଆ ମୁଖ
କ'ଣ ପାଇଁ ଦେଖେ ନାହିଁ ?
ଯଦି ପାରୁଥାନ୍ତା ଘୃଣିତ କରମୁ
ନଥାନ୍ତା କି ମନ ଫେଇ ?
କ'ଣ ପାଇଁ ଆଜି ଶୋଷକ ପଞ୍ଝାରେ
ଶୋଷିତଟି ଛଟପଟ
ସରବର ସମ ଅଧିକାର ନାହିଁ
କିଆଁ ଏମିତି କପଟ ?
ମରତେ ଜନମ ମରତେ ମରଣ
ଏକଥାଟି ଧୃବ ସତ୍ୟ
ଜୀଇଁବାର ଅଧିକାର ସଭିଙ୍କର
ମଝିରେ କିଆଁ ଅସତ୍ୟ ?
ମୁଁ ମୋର ବୋଲି ଚିତ୍କାରି ଚିତ୍କାରି
କ'ଣ ପାଇଁ ଅପକର୍ମ ?
ଅବୁଝା ମନଟି ବୁଝେନି କାହିଁକି
ସାଥେ ଯିବ ଏକା ଧର୍ମ ।
କ'ଣ ପାଇଁ ଆଜି ଯୁଦ୍ଧ ଘନଘଟା
ଚାଲେ ଦେଶ ଦେଶ ମଧ୍ୟେ
ବଡ଼ପଣିଆର ପ୍ରଦର୍ଶନ କରି
ଅମର କି କିଏ ମର୍ତ୍ତ୍ୟେ ?
ଗର୍ବ ଅହଂକାର ରହିନାହିଁ କା'ର
କ୍ଷଣସ୍ଥାୟୀ ଦୁନିଆରେ
କ'ଣ ପାଇଁ ତେବେ ଅସ୍ତ୍ର ଧରି ହାତେ
ରତଥିବା ଲଢ଼ିବାରେ ।
ମାନବ ମାନବ ମଧ୍ୟରେ ସମ୍ପର୍କ
କ'ଣ ପାଇଁ ଭୁଲିଯାଏ ?
ଟିକିଏ ମଧୁର ଆଦାନପ୍ରଦାନେ
ସୁଧା କି ମିଳି ନଥାଏ ?
ସରବ ସୁଖରେ ଚିନ୍ତା ଚୈତନ୍ୟକୁ
ଉପଯୋଗୀ ଏ ମଣିଷ
ସମୟେ ସମୟେ ହାରି ବି ଯାଉଛି
ନିୟତି ପାଖେ ବିବଶ ।
ପିତାମାତା ଆଜି ପରା ଅସହାୟ
ପୁତ୍ରେ ଶିକ୍ଷିତ କରାଇ
ମାନବିକ ଗୁଣାବଳୀର ବିକାଶ
ନ ହୋଇଲା କ'ଣ ପାଇଁ ?
ସମ୍ପର୍କଠୁ ଟଙ୍କା ବେଶି ମୂଲ୍ୟବାନ
ହୁଏ ଆଜି କ'ଣ ପାଇଁ ?
ସମ୍ପର୍କ ବିନା କି ମରତମଣ୍ଡଳେ
କିଏ କି ଜୀଇଁ ପାରଇ ?
କର୍ମ ଘେନି ଫଳ ଯାଚି ଦେଇଥାନ୍ତି
ପରା କରୁଣାନିଧାନ
କ'ଣ ପାଇଁ ଏହା ସ୍ମରଣ ରଖେନି
ଆମ ମାନବର ମନ ।