ନୂଆ ସକାଳ
ନୂଆ ସକାଳ
ପାହିଛି ରଜନୀ ହସୁଛି ଧରଣୀ ନୂଆ ସକାଳ ସ୍ପର୍ଶରେ
ଅଳସୀ ତରୁଣୀ ଦିଶୁଛି ସୁନ୍ଦରୀ ଦେଖ ବାଳଭାନୁ କରେ ।। ୧ ।।
ଧୀରେ ଧୀରେ ବହେ ଶୀତଳ ସମୀର ମନେ ଶିହରଣ ଭରି
ଆମ୍ରକୁଞ୍ଜେ ବସି ଗାଉଛି କୋକିଳ ପଞ୍ଚମ ରାଗିଣୀ ତୋଳି
ମନ୍ଦିର ପ୍ରାଙ୍ଗଣେ ବେଦମନ୍ତ୍ର ପାଠେ ତମସା ଲୁଚଇ ଦୂରେ
ଅଳସୀ ତରୁଣୀ ଦିଶୁଛି ସୁନ୍ଦରୀ ଦେଖ ବାଳଭାନୁ କରେ ।। ୨ ।।
କୃଷ୍ଣଚୂଡ଼ା ହସେ ରକ୍ତିମ ଆଭାରେ ବିହଙ୍ଗେ ଗାଆନ୍ତି ଗୀତ
ସୁନେଲି କିରଣେ ସ୍ଵର୍ଣ୍ଣୀମ ଧରିତ୍ରୀ ଦିଶଇ ସୁନ୍ଦର ମିତ ।। ୩ ।।
ପ୍ରଜାପତି ଉଡ଼େ ଫୁଲରୁ ଫୁଲକୁ ଭ୍ରମରେ ବଜାନ୍ତି ବଂଶୀ
ବନେ ଉପବନେ ଶୋଭାର ସମ୍ଭାର ପ୍ରଭାତେ ଉଠେ ବିକଶି
ଧୋଇନିଏ ପାଦ ଉତ୍ତାଳ ତରଙ୍ଗ ସୁଖେ ସାଗର ବୁକୁରେ
ପାହିଛି ରଜନୀ ହସୁଛି ଧରଣୀ ନୂଆ ସକାଳ ସ୍ପର୍ଶରେ ।। ୪ ।।
ହାତ ଠାରି ଡ଼ାକେ ରୂପର ପସରା ମୋହିନିଏ କବି ପ୍ରାଣ
କୋଟି ଲାବଣ୍ୟର ଅନିନ୍ଦ୍ୟ ଆଭାରେ କିଣିନିଏ ଜନ-ମନ ।। ୫ ।।