ନନ୍ଦ ଉତ୍ସବ

ସ୍ୱର୍ଗୁ ସୁମନ ବରଷେ, ନାଚନ୍ତି ଅପ୍ସରୀ l

ଦୁନ୍ଦୁଭି ବଜାନ୍ତି ଦେବେ ଡିବିଡିବି କରି ll

ଗନ୍ଧର୍ବ ଗାଆନ୍ତି ଗୀତ ବାଇ ବୀଣାବାଦ୍ୟ l

ଋଷି,ମୁନୀ,ବିପ୍ର ମିଳି ଗାଉଛନ୍ତି ବେଦ ll

ଚଉଦ ବ୍ରହ୍ମାଣ୍ଡ ଆଜି ଆନନ୍ଦେ ଅଧୀର l

ନାରାୟଣ ଜନ୍ମ ଧରି ନର କଳେବର ll

ସୁଗନ୍ଧିତ ଗନ୍ଧ ବହ ବହେ ମନ୍ଦ ମନ୍ଦ l

ଗୋକୁଳରେ ଯଶୋମତି କୋଳରେ ଗୋବିନ୍ଦ ll

ବୃନ୍ଦାବନରେ ମଧୁରେ ବାଜୁଛି ଵାଂଶରୀ l

କଦମ୍ବ, ତମାଳ, ମାଳ ଆନନ୍ଦିତ ଭାରି ll

ନନ୍ଦ ଭବନ ଆନନ୍ଦେ ପଡୁଛି ଉଛୁଳି l

ନାଚେ ନନ୍ଦ,ଯଶୋମତି ନାଚନ୍ତି ଗୁଆଳି ll

ଅନ୍ନ ଦାନ,ବସ୍ତ୍ର ଦାନ,ଧେନୁ ଦାନେ ନନ୍ଦ l

ଗାଆନ୍ତି ବିରୁଦାବଳି ଭାଟେ ଧରି ଛନ୍ଦ ll

ବାଜଇ ବାଜଣା ବାଜେ ଭେରୀ ବୀରତୂରୀ l 

ମଙ୍ଗଳ ଗୀତେ ବାଜଇ ମଙ୍ଗଳ ମହୁରୀ ll

ନନ୍ଦ ଗୃହେ ପୁତ୍ର ଜାତ ପଡ଼ିଛି ଚହଳ l

ଗୋପ ଗଉଡ଼ୁଣୀ ମାନେ ବାଞ୍ଛନ୍ତି ମଙ୍ଗଳ ll

ବାଞ୍ଛା କଳ୍ପତରୁ ପ୍ରଭୁ ଜଗତର ଗୁରୁ l

କୃଷ୍ଣଚନ୍ଦ୍ର ପାରି କର ଏ ଭଵ ସାଗରୁ ll

ଅଷ୍ଟମ ଗର୍ଭ ସନ୍ତାନ ଖୋଜୁଅଛି କଂସ l

ବାଳ ମୁକୁନ୍ଦ ହସନ୍ତି ମୁଚୁକୁନ୍ଦ ହସ ll

ନମସ୍ତେ ହେ ବାଳକୃଷ୍ଣ ନମଃ ଜନାର୍ଦ୍ଦନ l

କଞ୍ଜ ପଦେ ଭକ୍ତି ଥାଉ ଏହି ନିବେଦନ ll