ନୂଆ ସକାଳ

ନୂଆ ବରଷରେ ସିନା ଆସେ ଥରେ

ସୁନେଲି ଆଲୋକ ବୁଣି

ନୂତନ ଭାବନା ନବ ଉନ୍ମାଦନା

 ରୋମାଞ୍ଚ , ଉଲ୍ଲାସ ତୋଳି ।

କିନ୍ତୁ ପ୍ରତିଦିନ ଆସଇ ନୂତନ

ସମ୍ଭାବନା ରାଶି ଆଣି

ନୂଆ ସକାଳରେ ଶୀତୁଆ ପବନେ

କେତେ ଖୁସି ଲାଗେ ଚାହିଁ ।

ନବୀନ ଉଷାର ପହିଲି କିରଣ

ବୁଣି ଆସେ ନୂଆ ସକାଳ

ନବୀନ ଚମକେ ଚେତନା ଆବେଗ

ସାଥେ କେତେ ଯେ କୌତୁହଳ ।

ସୃଷ୍ଟିକରି ପ୍ରତି ଜନ ମନ ପ୍ରାଣ

ପୁଲକିତ କରି ପକାଏ

ଅନ୍ତରରେ ନବ ରୋମାଞ୍ଚ ଉଲ୍ଲାସ

ଉଦ୍ଦୀପନା କେତେ ଯୋଗାଏ ।

ଏ ନବସକାଳ ସଞ୍ଚାରେ ପ୍ରେରଣା

ସାହସ , ଶକତି , ଉତ୍ସାହ

ଜାଗୃତିର ଦିବ୍ୟ ପ୍ରଶାନ୍ତି ପ୍ଲାବନେ

ହରିନିଏ ମନରୁ ଭୟ ।

ନୂଆ ବରଷର ନୂତନ ସକାଳ

ନୂତନ ଭାବନା ନିମଗ୍ନ

କରାଏ ନିରତ ସାଧେ କେତେ ହିତ

ଦିଏ ନିତ୍ୟେ ଦିବ୍ୟ ଆହ୍ଵାନ ।