ନନ୍ଦୋତ୍ସବ ଏବେ ଆସିଲା

       ନନ୍ଦୋତ୍ସବ ଏବେ ଆସିଲା
         =============
ନନ୍ଦୋତ୍ସବ ଏବେ ଆସିଲା
                ଆସ ଆସରେ ଭାଇ l
ଖବର ପଠାଇ ଅଛନ୍ତି ଆମ
                    ଯଶୋଦା ଦେଈ ll
ଗୋପପୁରେ ନନ୍ଦ ଉତ୍ସବ
                    ଜାତ ନନ୍ଦ ନନ୍ଦନ l
ଉଠୁଛି ପଡ଼ୁଛି ଆନନ୍ଦେ
                   ଆଜି ନନ୍ଦ ଭବନ ll
ବାଜେ ସିଙ୍ଗା ବେଣୁ ବଇଁଶୀ
                   ସଜ ଦିବ୍ୟ କଳସ l
ମଙ୍ଗଳ ମହୁରୀ ବାଜଇ
               ଶୁଭେ ଶଙ୍ଖ ନିର୍ଘୋଷ ll
ସର୍ବ ଦେବାଦେବୀ ଆସିଣ
                ବ୍ରଜେ ହେଲେଣି ରୁଣ୍ଡ l
ଗହଳିରେ ଫାଟି ପଡ଼ୁଛି
                   ଭାଇ ବରଜ ଦାଣ୍ଡ ll
ଖିରି ସରପୁଳି ନବାତ
                 ନନ୍ଦରାଣୀ ଯଶୋଦା l
ବାଢ଼ି ରଖିଛନ୍ତି ମନରେ
                ବହି କେଡ଼େ ଶରଧା ll
ବ୍ରାହ୍ମଣଙ୍କୁ ଦାନ ସୁବର୍ଣ୍ଣ
               ହାତୀ ଘୋଡ଼ା ପାଲିକି l
ଚାଲ ଚାଲ ଯିବା ନ ଥିବ
                   ଆଉ ପୁଣି କାଲିକି ll
କୁଆଁରାବ ଶୁଭେ ମଥୁରା
                 କଂସର ବନ୍ଦୀ ଘରେ l
ଜନମିଲେ ମାଆ ଅମ୍ବିକା
              ଦେବକୀଙ୍କ କୋଳରେ ll
କୃଷ୍ଣଙ୍କୁ ଝୁଲାନ୍ତି ତରୁଣୀ
                 ସର୍ଵ ଗୋପ ଗୁଆଳୀ l
ମନ ରଙ୍କା ବଙ୍କା କରିବା
                ପ୍ରେମେ ମାରିଣ ତାଳି ll
କୃଷ୍ଣହସ୍ତେ ଦେବା ଧରାଇ
                  ସୁନା ବେଣ୍ଟ ବଇଁଶୀ l
ବ୍ରହ୍ମା ଗଢ଼ିଥିଲେ ଯାହାକୁ
                     ଯୁଗ ଯୁଗ ଭରସି ll
ଯମୁନା ଜଳରେ ସ୍ନାହାନ
                    ପାନ ଯମୁନା ଜଳ l
ରାଧାକୁଣ୍ଡ ଶ୍ୟାମ କୁଣ୍ଡରେ
                   ଯିବ ପାପ ପଖାଳ ll
ଜୟ ଜୟ ଜୟ ଶ୍ରୀକୃଷ୍ଣ
                   ଆହେ ଜଗତ ଗୁରୁ l
ବାଞ୍ଛା ପୁରାଇବ ପ୍ରଭୁହେ
                 ମୋ ବାଞ୍ଛା କଳ୍ପତରୁ ll
              🙏🙏🙏
                  ଅର୍ଜୁନୀ
               -------------
ଅର୍ଜୁନୀ ଚରଣ ବେହେରା
ମୋ -୭୬୯୩୦୯୧୯୭୧