ବନ୍ଦଇ ଭୁବନ ଭାସ୍କରେ

       ବନ୍ଦଇ ଭୁବନ ଭାସ୍କରେ     
       =============
ପାହିଗଲା ଏବେ ରଜନୀ
            ଉଦେ ହେଲେ ଅରୁଣ ।
ତାପରେ ତପାନ୍ତି ଧରାକୁ
              ତାଙ୍କ ନାମ ତପନ ।।
ଆଦି ଦେବତା ସେ ଆଦିତ୍ୟ
               ତାଙ୍କ ମାତା ଅଦିତି ।
ଦିନନାଥ ଦିବାକର ସେ
               କରନ୍ତି ଦିନ ରାତି ।।
ପ୍ରଭାକର ତାଙ୍କ ପ୍ରଭାକୁ
              ଦେଖ ଦିଶେ ଉଜ୍ଜ୍ୱଳ ।
ସପ୍ତାଶ୍ଵ ବାହନ ରଥରେ
               ତାଙ୍କ ଗତି ଚଞ୍ଚଳ ।।
କଶ୍ୟପ ଋଷିଙ୍କ କୁମର
              ତାଙ୍କ କନ୍ୟା ତପତି ।
ମରତେ ବରିଲେ ତପତି
                 ସମ୍ବରଣ ନୃପତି ।।
ତାଙ୍କ ପୁତ୍ର ପୁଣି ସମ୍ଭବ ରାଜା
                       କୁରୁ ରାଜନ ।
କୁରୁ ବଂଶ ଥାପି ପ୍ରସିଦ୍ଧ
            ଯାହା କହେ ପୁରାଣ ।।
ତପତି ମରତେ ବହିଲେ
             ହୋଇ ନଦୀ ମୁରତୀ ।
କୁରୁ ମହାରାଜ ଥାପିଲେ
            କୁରୁକ୍ଷେତ୍ରେ କିରତୀ ।।
ମହାରାଜା ମନୁ ଜନ୍ମିଲେ
              ପୁଣି ସୂର୍ଯ୍ୟ ଅଂଶରେ ।
ସୂର୍ଯ୍ୟ ବଂଶ ଥାପି ରଖିଲେ
             କୀର୍ତ୍ତି ଏହି ମହୀରେ ।।
ତପନ କୂଳରେ ଜନ୍ମିଲେ
                ପୁଣି ପ୍ରଭୁ ଶ୍ରୀରାମ ।
ପୟରେ ତାଙ୍କର କରୁଛି
              ମୁହିଁ କୋଟି ପ୍ରଣାମ ।।
ଶାମ୍ବ କୃଷ୍ଣ ପୁତ୍ର ଆରୋଗ୍ୟ
              ହେଲେ ପୂଜି ଭାସ୍କର ।
ଅର୍କ କ୍ଷେତ୍ରେ ରାଜେ ପ୍ରସିଦ୍ଧ
               କୋଣାରକ ମନ୍ଦିର ।।
ବିଶ୍ବ ସିନା ତାଙ୍କ ସର୍ଜନା
                ସେହି ବିଶ୍ବ ନିୟନ୍ତା ।
ସକଳ ଶକ୍ତିର ଆଧାର ପ୍ରଭୁ
                    ସୂର୍ଯ୍ୟ ଦେବତା ।।
ନମଃ ନମଃ ସଂଜ୍ଞା ପତି ହେ
                 ପ୍ରଭୁ ଛାୟା ରମଣ ।
ବନ୍ଦଇ ଭୂବନ ଭାସ୍କରେ
              ବନ୍ଦେ ସୃଷ୍ଟି କାରଣ ।।
              🙏🙏🙏
                  ଅର୍ଜୁନୀ
               ---------------
 ଅର୍ଜୁନୀ ଚରଣ ବେହେରା
 ମୋ -7693091971