ନମଃ ଛାୟାକାନ୍ତ

ପୂର୍ବ ଦିଗୁ ମୁର୍ଯ ବୁଣି ସୂର୍ଯ୍ୟ ଆସେ ଉଇଁ

ଆଲୋକରେ ଉଦ୍ଭାସିତ ଗିରି ବନ ଭୂଇଁ l

ପ୍ରତେ ହୁଏ ଊଷା ପିନ୍ଧି ସିନ୍ଦୁରରେ ଭୁଷା

ସ୍ୱାଗତେ ଗାଉଛି ସୂର୍ଯ୍ୟ ଆଗମନ ଭାଷା l

ଧୀରେ ଧୀରେ ବହୁଅଛି ପ୍ରଭାତୀ ପବନ

ଫୁଟିଲେଣି ଜାଇ, ଜୁଇ,ମାଳତୀ ସୁମନ l

ଶେଫାଳିର ମନେ କିନ୍ତୁ ନାହିଁ ଟିକେ ସୁଖ

ରାତ୍ରୀ ରାଣୀ ଝଡିଲାଣି ସୁରୁଯେ ବିମୁଖ l

ଫୁଲେ ଫୁଲେ ଚୁମି ଚୁମି ବୁଲୁଛନ୍ତି ଅଳି

କଜ୍ଵଳ ପତ୍ରୀର ଶୁଭେ ମଧୁର କାକଳୀ l

ପକ୍ଷୀ କୂଳେ କଳ ରବେ କରନ୍ତି କୁଜନ

କୁକ୍କୁଟ ମୁକୁଟ ଟେକି ଡାକେ ନାରାୟଣ l

ଭଵ ଭୟ ହାରୀ ପ୍ରଭୁ ଆହେ ଚକ୍ରଧର

ହୀନ ପକ୍ଷୀଜନମରୁ ବେଗେ ପାରିକର l

କୀଚକ ଭୟେ ଲୁଚିଲେ ପେଚକ ସମସ୍ତ

ତାରାଗଣ ଜଣ ଜଣ ହୋଇଲେଣି ଲୁପ୍ତ l

ବିଷ୍ଣୁ ଆଳୟରୁ ଶୁଭେ ପ୍ରଭାତୀ କୀର୍ତ୍ତନ

ଗୀତାପାଠ କାହିଁ ପୁଣି ପୁଣ୍ୟ ରାମାୟଣ l

ଶମ୍ଭୁଆଳେ କମ୍ଭୁ ତୋଳେ ଓଁକାର ଝଙ୍କାର

ଆଶୁତୋଷ ବିଶ୍ୱ ତୋଷ ଦେବ ମହେଶ୍ୱର l

ହରେକୃଷ୍ଣ ହରେରାମ ଶ୍ରୀରାଧେ ଗୋବିନ୍ଦ l

ନମଃ ଛାୟାକାନ୍ତ ବିଶ୍ୱ ଚକ୍ଷୁ ହେ ମାର୍ତ୍ତଣ୍ଡ ।