ତମସା ତୀରେ

ଧନ୍ୟଲୋ ତଟିନୀ ତମସା 

           ତୁହି ସୁର ନନ୍ଦିନୀ

ଆଶ୍ରମ ଥାପିଲେ ତୋ ତୀରେ 

          ବାଲ୍ମିକୀ ମହାମୁନୀ l

ତୋ ତୀରେ ମହର୍ଷି ଦେଖିଲେ 

         ଯେବେ କ୍ରୋୖଞ୍ଚ ମିଥୁନ

ବିଦ୍ଧ କଲା କାହୁଁ ଆସିଣ 

          ଏକ ବାଣ ଦାରୁଣ l

ଚମକି ଚାହାଁନ୍ତି ପୁରାଣ ମୁନୀ 

             ପାଶେ ନିଷାଦ

ମନେ ଘୋଟିଗଲା ମୁନୀଙ୍କ 

        ଘୋର ଶୋକ ବିଷାଦ l

ଶୋକୋତ୍ସ୍ୱାସେ ମୁନି ନିଷାଦେ 

          ଦେଲେ ଅଭିସମ୍ପାତ

ଆଦି ଶ୍ଳୋକ ନାମେ ହୋଇଲା 

        ତାହା ସଂସାରେ ଖ୍ୟାତ l

ଲକ୍ଷ୍ମଣ ତୋ ତୀରେ ଵିସର୍ଜି 

         ଗଲେ ମାତା ଜାନକୀ

ପୁତ୍ରୀ ପ୍ରାୟେ ତାଙ୍କୁ ପାଳିଲେ 

         ମହାମୁନୀ ବାଲ୍ମିକୀ l

କାଳେ ଜନ୍ମ ହେଲେ ମାତାଙ୍କ 

           ଦୁଇ ଯମଜ ସୂତ

ରାମାୟଣ ଗାନ ଶିଖିଲେ 

          ମହାମୁନୀ ଲିଖିତ l

ରାମାୟଣ ଗାଇ ଅଯୋଧ୍ୟା 

          ନଗ୍ର ଯଜ୍ଞ ସ୍ଥଳୀରେ

ରାମ ସୀତା ପୁନର୍ମିଳନ 

         ଲବ କୁଶ ସାଥିରେ l

ଚିତ୍ରକୁଟ ଘାଟ ତଟରେ 

           ତୁଳସୀଙ୍କ ଚନ୍ଦନ

ତିଳକ ଘେନିଲେ ସାଦରେ 

         ବେନି ରଘୁ ନନ୍ଦନ l

ଭରତ ଘେନିଲେ ପାଦୁକା 

       ଆସି ତୋହର ତୀରେ

ଚଉଦ ବରଷ ପୂଜିଲେ 

        ଥାପି ନନ୍ଦି ଗ୍ରାମରେ l

ରାମମୟ ତୋର ଗାତ୍ରଲୋ 

         ରାମାୟଣ ଜନନୀ

ଉଦାତ୍ତେ ତୁଳସୀ ବାଲ୍ମିକୀ 

      ବନ୍ଦିଲେ ତୋତେ ବେନି l

ତବ ଦରଶନେ ପୁରିଲା 

      ବାଂଛିତ ଆଶା ମୋର 

ମନରଙ୍କା ଛଡ଼ାଇବିଲୋ 

        ଗ୍ରାସି ବାରି ତୋହର l

ରାମଗାତ୍ରୀ ମାଆ କରୁଣା 

       ଟିକେ କରିବୁ ମୋତେ

ରାମ,ସୀତା,ଭ୍ରତ,ଲକ୍ଷ୍ମଣ 

       ଥାନ୍ତୁ ମୋ ନେତ୍ରପଥେ l

ଜୟ ସୀତା ରାମ ଲକ୍ଷ୍ମଣ 

          ଜୟ ରଘୁ ନାୟକ

ଅଜ୍ଞାନ ତିମିର ନାଶ ମୋ 

          ଧରି ତୁମ୍ଭ ସାୟକ l