ମଦ ର ଯୁଆର

ହେଉ ସିଏ ମଫସଲ ଅବାସେ ସହର

ସବୁଠାରେ ଉଛୁଳୁଛି ମଦର ଯୁଆର ।

ଗରିବଙ୍କ ମନ ଖୁସି ପିଇଦେଲେ ଦେଶୀ

ବାବୁମାନେ ଝୁମିଥାନ୍ତି ପିଇତ ବିଦେଶୀ ।

ସଭ୍ୟତାର ମାପକାଠି ଏବେ ଏଇ ମଦ

ମଦ ବିନା ଆଖିରେ ତ ଆସୁନାହିଁ ନିଦ ।

ବଡ ବଡ ଧନୀ ଘରେ, ସାରା ପରିବାର

ଏକାଠି ପିଅନ୍ତି ମିଶି ରଅମ୍ ବିଅର୍ ।

 କୁହଇ ଚିଅସ ଝିଅ ମାଆକୁ ତ ହସି

ବାପ ସାଥେ ପୁଅ ପୁଣି ପିଉଥାଏ ବସି ।

ମଦ ପାଇଁ ସମାଜରେ ବିଶୃଙ୍ଖଳା ଯେତେ

ଚୋରି ନାରୀ ଅପରାଧ ବଢେ ନିତି କତେ ।

ମଦ ଯୋଗୁ ଘରେ ଘରେ ବଢୁଛି ଅଶାନ୍ତି

ନାରୀ ନିର୍ଯାତନା ବଢେ ବଢୁଛି ଅନୀତି ।

ମଦ ଯୋଗୁ ଉଜୁଡୁଛି କେତେ ପରିବାର

ସୁନା ଘର ଚୁନା ହୁଏ ଉଜୁଡେ ସ°ସାର ।

ସବୁ ଜାଣି ସରକାର ଜାଣନ୍ତିନି କିଛି

କାରଣ ,ମଦ ରୁ ବେଶି ରାଜସ୍ୱ ମିଳୁଛି ।

ମଦ ନିୟନ୍ତ୍ରଣ ପାଇଁ ବିଭାଗ ରହିଛି

ବାଡ କିନ୍ତୁ ନିତି ସେଠି ଫସଲ ଖାଉଛି ।

ମଦ କଥା ବାହୁନିଲେ ହୋଇଯିବ ପୋଥି

କରୁଣ କାହାଣୀ କେତେ ଲେଖା ହୁଏ ନିତି।

ମରିବ ଦରିଦ୍ର ହେବ ପିଇଲେତ ମଦ

ଅବୁଝାଙ୍କୁ ଏଇ କଥା କରେ ସତେ ବାଦ ।