ବିରାଜିତ ହୁଏ ବସନ୍ତ ରାଜ

ପାଦପେ ପତର ପେଶିଛି ଆଜ

କୁହୁ କୁହୁ ତାନେ କୋକିଳ ସଜ

ମଧୂପ ମଧୁ ଗୁଞ୍ଜନ ବିରାଜ

ବିରାଜିତ ହୁଏ ବସନ୍ତ ରାଜ ।

ନବ କିଶଳୟେ ଲତା ଶୋଭନ

ଶୀତ ଗତ ବାତ ମୋହୁଛି ମନ

ସୁଲୁ ସୁଲୁ ବାଆ ବହୁଛି ଧୀରେ

ବସନ୍ତ ରାଜଙ୍କୁ ବ୍ୟଜନ କରେ ।

ଛାଇରେ ଲାଗୁଚି ଅଳପ ଶୀତ

ଖରା ତାତି ଲାଗେ ଭାରି ଉତ୍ତପ୍ତ

ଫୁଟିଲାଣି ଫୁଲ ଭାରି ବଢିଆ

ବନ ଉପବନ ଦିଶୁଛି ନୂଆ ।

ପେନ୍ଥା ପେନ୍ଥା ହୋଇ ଫୁଟିଛି ଫୁଲ

ମଧୂପ ଗୁଞ୍ଜନ ଅମୂଲ ମୂଲ

ସରଳ ପଥରେ ଗମନ୍ତି ରବି

ପୁଲକିତ ଧରା ସୁନ୍ଦର ଛବି ।

ଦିନ ବର୍ଦ୍ଧନରେ କୋକ ଦମ୍ପତ୍ତି

ହରଷିତ ପାଇ ପ୍ରିୟ ସମ୍ପତ୍ତି

ଋତୁରାଜ ଆଗମନୀ ବାରତା

ପ୍ରଚରିଲା ଧରା ଅମରମତା  ।

ମନସିଜ ବିନ୍ଧେ କୁସୁମ ଶର

କାମି କାମିନୀ ହୋଇଲେ ଅସ୍ଥିର

ଫାଲ୍ଗୁନ ଚଇତ୍ର ବସନ୍ତ ରାଜ

କି ସୁନ୍ଦର ଧରିତ୍ରୀ ସଜବାଜ ।

ବାସନ୍ତିକ ଦୁର୍ଗାପୂଜା ଆସିବ

ତିନିଦିନ ପୂଜା ଶେଷ ହୋଇବ

ଚାଚେରୀ ଲୀଳାର ଆରମ୍ଭ ହେବ

ରାଧାମାଧବ ବିମାନ ଚଳିବ ।

ସଞ୍ଜ ନଇଁଲେ ଉଠିବ ବିମାନ

କାନ୍ଧେଇବେ ତାକୁ ଭକତ ଜନ

ଆମ୍ବ ଚଣା ଖଇ ଉଖୁଡା ଆଦି

ଖୁସିଖଜା ସହ ସବୁ ସମ୍ପାଦି ।

ଭୋଗ ଲଗାଇ ମୁଣ୍ଡେ ଫଗୁ ବୋଳି

ଭକତେ ଆନନ୍ଦରେ କୋଳାକୋଳି

ଭାଇଚାରାର ଏ ଦୋଳ ଯାତରା

ଶେଷ ହୁଏ ଦୋଳ ହୋଲିରେ ସାରା ।

ଋତୁରାଜ ଆଣେ ମନେ ହରଷ

ବସନ୍ତ ଉତ୍ସବ ବଡ ସରସ

ବସନ୍ତ ଋତୁ ସମ ଋତୁ ନାହିଁ 

ଋତୁରାଜ ନାମ ବହନ୍ତି ସେହି ।