ସଂଘର୍ଷର ରକ୍ତତୀର୍ଥ
ସଂଘର୍ଷର ରକ୍ତତୀର୍ଥ
ଶୋଷଣ ହୋଲିରେ ମାନବ ଭିଜଇ
ଦଦରା ନାବରେ ବସି,
ମଗର ସାଂକୁଚ ସାଜିଣ ପିଶାଚ
ଜଗିଛନ୍ତି ଦିବାନିଶି ।
ଅର୍ଥ ମେରୁଦଣ୍ତ ଭଂଗା ଦଧି ଭାଣ୍ତ
ବିବେକ ଖାଉଛି ଚାଟି,
ଭଦ୍ର ମୁଖାତଳେ ସ୍ୱାର୍ଥ ଦୀପ ଜଳେ
ସାନ୍ତ୍ୱନାକୁ ଦେଇ ଭେଟି ।
କପଟ ପଶାରେ ମାପ ତଉଲରେ
ହୁଏ ଖାଲି କିଣାବିକା,
ଶାଗୁଣା ମୁହଁର ଶାକାହାରୀ ସ୍ୱର
ଉଡେ ବିଜୟ ପତାକା ।
ମଦ ମାଂସ ନାରୀ ଆଭିଜାତ୍ୟ ଶିରି
କଂସାରି ଘରର ପାରା,
ଘର ଅଛି ଚାଳ ଗଲାଣି ବଉଳ
ସଭ୍ୟତା ସଫା ସୁତୁରା ।
ଚକ୍ରବ୍ୟୁହ ଜୁଇ ରକ୍ତ ମାଂସ ଖାଇ
ପଲଂକେ ମାରଇ ହାଇ,
ସାଧୁବାଣୀ କହି ବିଭବ ଚୋରାଇ
କାନ୍ଦୁ ଆମେ କଇଁକଇଁ ।
ନିର୍ଲଜ ମୁହଁରେ ଗାଉ ଆଖଡାରେ
ସାଜି ଖଳ ବିଭୀଷଣ,
ବ୍ୟାସ ସରୋବରେ ଲୁଚି ନିର୍ଭୟରେ
ହେଉ କଳି ଦୁର୍ଯ୍ୟୋଧନ ।
ଅଂକ ଦ୍ରବ୍ୟେ ପ୍ରୀତି ଦେଖି ନିତିନିତି
ମୋହ ମାୟା ଶିକୁଳିରେ,
କଛପ ସାଜିଛୁ ବାଲି ଗରଡାରେ
ଆଭିଜାତ୍ୟ ବନ୍ଧନରେ ।
ନିଆଁଖୁଣ୍ଟା ଦେଇ ନରମାଂସ ଖାଇ
ଶ୍ୱାନ ସାଜିଛୁ ଜଗତେ,
କାଳ ବନ୍ଧନରେ ମୋହ ଜଉଘରେ
ସପନ ଦେଖୁ ମରତେ ।