ପତ୍ରବନ୍ଧୁ
ପତ୍ରବନ୍ଧୁ
ଜୟ ଢାକେଶ୍ଵରୀ କି ଶୁଭ ଲଗନେ
ଆଜ ରାତି ପାହିଥିଲା l
ପତର ତୁମ୍ଭର ପତର ବନ୍ଧୁ ହେ
ପତ୍ରବନ୍ଧୁ ଦେଇଗଲା ll
କାହୁଁ ଉଡ଼ିଆସି ଚାଳ ପରେ ବସି
ଡାମରା ଡାକିଲା କାଆ l
ବାରତା କି ହାକି କହୁଥିଲା ଡାକି
ଢାକାରୁ ବହିଲା ବାଆ ll
ସୁଗୋଲ ସୁଠାମ ଅକ୍ଷର ତୁମ୍ଭର
ମଧୁବୋଳା ତୁମ ଭାଷା l
ତୁମ୍ଭେ ପରା ମଧୁ ମୋର ପତ୍ରବନ୍ଧୁ
ଷାଠିଏ ବରଷ ଖାସା ll
କାହିଁ କେତେଦୂର ବଙ୍ଗଳା ନଗର
ଢାକାଠାରେ ତୁମ ଠାବ l
ଭେଟ ହୋଇନାହିଁ କେବେ ଦିନେ ଭାଇ
ପତ୍ରରେ ରହିଛି ଭାବ ll
ବାଂଲା ଯୁଦ୍ଧକାଳେ ଦୁହେଁ ବନ୍ଧୁ ହେଲେ
ପତ୍ରେ ଭାବ ବିନିମୟ l
ଯୁବା ବୟସରୁ ଉପନୀତ ହେଲେ
ଏବେ ବନ୍ଧୁ ବୃଦ୍ଧବୟଃ ll
ମନେ ଥିଲା ବ୍ୟଥା ଶୁଣି ତୁମ କଥା
ତୁଟିଲା ସକଳ ଭ୍ରାନ୍ତି l
ପତ୍ରରୁ ଜାଣିଲି ଆନନ୍ଦିତ ହେଲି
ଶୁଭେ ବନ୍ଧୁ ରହିଛନ୍ତି ll
ପୁତ୍ର ପୌତ୍ର ପୁତ୍ରୀ କୁଶଳେ ଅଛନ୍ତି
କୁଶଳେ ଛନ୍ତି ବାନ୍ଧବୀ l
କୁଶଳରେ ମଧୁ ଥିବ ଆଶା ବନ୍ଧୁ
ନିଶ୍ଚୟ ବାନ୍ଧବୀ ଛବି ll
ଉତ୍ତର ଲେଖିଲି ପତରେ ତୁମ୍ଭର
ପତ୍ର ପାଇ ପତ୍ର ଦେବ l
କୁଶଳରେ ଥାଇ କୁଶଳ ଜଣାଏ
କୁଶଳୀଙ୍କୁ ଜଣାଇବ ll
ଈଶ୍ୱରେ କରନ୍ତୁ ଆଜ ନାହିଁ କାଲି
ଦେଖା ଆମ୍ଭ ଶୀଘ୍ର ହେଉ l
ପତରେ ପତରେ ବନ୍ଧୁତା ଆମର
ଜନ୍ମ ଜନ୍ମାନ୍ତରେ ଥାଉ ll