ନିରେଖିବି ଆଗୋ ସଖି
ନିରେଖିବି ଆଗୋ ସଖି
ଜାନକୀ ଗୋ ଏଇ ବନଫୁଲରେ ମୁଁ
ଗଜରା ଆଣିଛି ଗୁନ୍ଥି ,
ତୁମରି ଜୁଡ଼ାରେ ଖୋସିଦେବି ତାକୁ
ଝଲସି ଉଠିବ କାନ୍ତି ।
ରାଜ ସୁଖ ଶିରୀ ତୁଚ୍ଛ କରି ତୁମେ
ମୋ ସାଥେ ଆସିଛ ବନେ ,
ଅଶେଷ ଯାତନା ଭୋଗୁଅଛ ଏଠି
ବହୁବାର ଚିନ୍ତେ ମନେ ।
ନାହିଁ ହୀରା,ମୋତି ଅଳଙ୍କାର କିଛି
ତୁମ ଅଙ୍ଗେ ମଣ୍ଡିବାକୁ ,
ପୁଷ୍ପର ଗହଣା କରି ପିନ୍ଧାଉଛି
ଅବଶୋଷ ଖଣ୍ଡିବାକୁ ।
ଝଟକି ଉଠିବ ତୁମ ଅଙ୍ଗ ଶୋଭା
ନିରେଖିବି ଆଗୋ ସଖି ,
ଓଠ ଧାରେ ହସ ଉକୁଟି ଉଠିଲେ
ଅନ୍ତର ହୋଇବ ସୁଖୀ ।