କୁସୁମ ରାଣୀ

ଶ୍ରବଣେ ଶୁଣ ମର୍ମ ବାଣୀ କୁସୁମରାଣୀ

ମୌନେ ମୁହିଁ ବସିଛି ଚାହିଁ ବଉଳ କଷି

ମଗ୍ନେ ଦେଖେ ଚପଳ ତୁମ୍ଭ ନୟନ ବେନି

ସ୍ୱପ୍ନେ ବକ୍ରେ କହୁଛ ଆସି ସସ୍ମିତେ ହସି l

କଳ୍ପଲୋକେ ସଜ୍ଜିତ ମୁଁ ଯେ ରାଜକୁମାର

ଅଶ୍ୱ ପୃଷ୍ଠେ କୌତୁକେ ଭ୍ରମେ ଅମ୍ବର ଦେଶ

ଅଙ୍କେ ବସି ଚନ୍ଦ୍ରହାସୀ ମୁଗ୍ଧେ ଦୃଷ୍ଟି ତୋର

ସମୀରେ ମୋର ବକ୍ଷେ ବାଜେ ସୁକେଶ ବାସ l

ଦୃଷ୍ଟି ଦେଖେ ସବୁଜ ଶୁଭ୍ର ଗିରି ନିର୍ଝର

ପାଦପ ଲତା ପୁଷ୍ପ ରାଶି ଭ୍ରମର ଦଳ

ଲୁବ୍ଧ ଚିତ୍ତ କୋକିଳ ସ୍ଵନ ପତ୍ର ମର୍ମର

ଦର୍ପକ ଦର୍ପେ ବିଦ୍ଧ କରେ ହୃଦୟ ସ୍ଥଳ l

ସଲ୍ଲଜେ ଚିନ୍ତେ ସ୍ୱପ୍ନାଲୋକେ ମୁଁ ହତଭାଗ୍ୟ

ଖର୍ବ ହୋଇ ଜହ୍ନେ ଲକ୍ଷ୍ୟ ଏ କି ସଉଭାଗ୍ୟ l