ମାଟିରୁ ଆକାଶ

ପକ୍ଷୀଠୁ ଶିଖିଛି  ସ୍ୱାଧୀନ ବିହାର 

   ଝରଣା ଠୁ ମିଠା ଗୀତ

ମହୁମାଛି ଠାରୁ   ଶିଖି ଲଭି ଅଛି                        

    ଜ୍ଞାନ ମଧୁ -ଚକ୍ର ପଥ l

ଫୁଲଠୁ ଶିଖିଛି କୋମଳ ଭାବନା

    ମହକ ଗୁଣ ଚେତନା

ଆକାଶର ରଂଗ   ବତାଇ ଦେଇଛି

    ନିର୍ମଳ ବ୍ୟାପ୍ତି ପ୍ରେରଣା l

ନଈଠୁ ଶିଖିଛି     ଏକ ମୁଖୀନତା

     ସାଗରଠୁ ଗଭୀରତା

ଭୂଧର ଦେଇଛି   ଧୈର୍ଯ୍ୟ ଧରିବାକୁ

     ପୃଥିବୀଠୁ ସହିଷ୍ଣୁତା l

ଜହ୍ନଠୁ ଆଣିଛି    ଶୀତଳ ନରମ

      ବିଶୁଦ୍ଧ ହୃଦୟ କଥା

ବୃକ୍ଷଠୁ ଶିଖିଛି    ଦାନ ଦୟା କ୍ଷମା

      ବୁଝିବାକୁ ଦୁଃଖୀ ବ୍ୟଥା l

ସୂର୍ଯ୍ୟଠୁ ଲଭିଛି    ଜଗତ ପାଳନ

      ମେଘଠୁ ମହ୍ଲାର ସ୍ୱର

କପୋତଠୁ ଶାନ୍ତି  କୋଇଲିଠୁ ବାଣୀ

      ବରିଅଛି ରାଗ ତାଳ l

ଶିଖିବାର ଯାହା     ଶିଖୁଥିବି ବସି

       ମନ୍ଦ କଥା ଦେବି ଛାଡ଼ି

ଆନନ୍ଦେ ବିଷାଦେ   ସମଭାବେ ଥିବି

       ବିନୟ ଭୂଷିତ ହୋଇ l

ଏ ଅମୃତ ସୃଷ୍ଟି     ପାଠଶାଳା ମୋର

       ଆନ ପାଠେ ମନ କାହିଁ

ମୋ ପାଶେ ଈଶ୍ୱର    ପରମ ଆଚାର୍ଯ୍ୟ

     ଥିଲେ କିଛି ଲୋଡ଼ା ନାହିଁ l