ଠାରି ଦେଲେ

ଠାରି ଦେଲେ ଥରେ

ଆଖିରେ ହେଉ କି ହାତରେ

କିମ୍ବା ଓଠରେ ଝରେଇ ଦେଲେ

ମିଠାମିଠା ଶବ୍ଦରେ

ଗୋଟେ ବିଶ୍ୱସ୍ତ ହୃଦୟରେ

ପ୍ରେମ ଖୋଜି ଖୋଜି

ବିମୁଗ୍ଧ ଚିତ୍ତରେ ପାଖରେ

ଗେଲ ହୁଅନ୍ତି ଅରଣ୍ୟର ପଶୁ

ପାହାଡ଼ ଚୂଳରୁ ଓହ୍ଲେଇ ଆସନ୍ତି ମୟୂର l

ହାତ ଠାରି ଡାକିଲେ ଜହ୍ନକୁ

ଜହ୍ନ ଗଦେଇ ଦିଏ ପାପୁଲିରେ ଜୋଛନା

ସବୁ ବିଶ୍ୱସ୍ତ ପ୍ରେମର ଆକର୍ଷଣ

ଏଥିରେ ବା କାହିଁ କାମନାର ଜିଭ

ଆୟୁଷକୁ ଚାଟି ଚାଲୁଥିବ

ପ୍ରତାରିତ କରି ନିରୀହ ଆତ୍ମାକୁ?

ଟିକିଏ ଆ କହିଲେ

ଲଟେଇ ଯାଏ ହାତ ସର୍ବାଙ୍ଗକୁ

ଡେଣା କଅଁଳି ଯାଏ ଅସମ୍ଭବ ମୁଦ୍ରାରେ

ସେ ଛଳ ରଖିଛି କି ପ୍ରେମ ରଖିଛି

ଆଉଁସି ଦେବାକୁ ମୋର ଗ୍ରୀବା ଏବଂ ବକ୍ଷ

ମୁଁ କିନ୍ତୁ ଶେଷଯାଏଁ

କରୁଥିବି ଅନୁଭବ ଅଦ୍ଭୁତ ରୋମାଞ୍ଚ l