ନିଜକୁ ପ୍ରଶ୍ନ

ପଚାରୁଛି ନିଜେ ନିଜକୁ ପ୍ରଶନ 

ପାଉନି ଖୋଜି ଉତ୍ତର 

ଜାଣି ବୁଝି ଠିକ କାହିଁକି ମଣିଷ

କାମକୁ କରଇ ଭୁଲ ।

ପଢନ୍ତି ସଭିଏଁ ପାଠକୁ ଉତ୍ତମ 

ଯୋଗ୍ଯତା ହାସଲ କରି

କାହିଁକି କରନ୍ତି ନିନ୍ଦିତ କରମ

ନିପଟ ମୁରୁଖ ପରି ।

ସୁସ୍ଥତା ନିମନ୍ତେ ଅତି ଆବଶ୍ୟକ 

ଆହାର ସୁଷମ ଖାଦ୍ଯ 

କୀଟାଣୁ ଜୀବାଣୁ ସଂସର୍ଗିତ ହେଲେ

ଘଟେ ରୋଗ ପ୍ରାଦୁର୍ଭାବ ।

ନ୍ଯାୟ ପ୍ରଶାସନ ଶିକ୍ଷା ସ୍ବାସ୍ଥ୍ୟ ସେବା

ନ ହୋଇବ ଯଦି ସ୍ବଚ୍ଛ

ସମାଜ ଉନ୍ନତି ହୋଇବ କିପରି

ଭାରତ ହେବ ଉନ୍ନତ ।

ଦେଇ ପ୍ରଲୋଭନ କେବଳ ଭାଷଣ

କାମକୁ କଲେ ଓଲଟା

ମରିବେ ଝିଣ୍ଟିକା ପୋଷି ହେବେ ବଣି

ବଢିବେ ଥନ୍ତଲ ପେଟା ।

ସହି ହୁଏ ନାହିଁ କହି ହୁଏ ନାହିଁ

ଘାରଇ ମରମେ ବ୍ଯଥା

ବଢୁଛି ଭଣ୍ଡାମୀ ଦଲାଲି ତସ୍କରି

ଭକୁଆ ଏଠି ଜନତା ।

ଲଦି ଦିଅ ନାହିଁ ସବୁ ଦୋଷ ତକ

ନୀରିହ ଜନତା ମୁଣ୍ଡେ

ପଚାର ନିଜକୁ ଠିକ ଅବା ଭୁଲ

ଭୟ କର ଯମ ଦଣ୍ଡେ ।।