Library
ନୀରବି ଯାଇଛି ମନର ଝଡ଼
ନୀରବି ଯାଇଛି ମନର ଝଡ଼
ଆଜି ପରିବେଶ ପରିସ୍ଥିତି ଗମ୍ଭୀର
ଶୋକାକୁଳ ସମୂହ ପରିବାର
ଆଖିରେ ଲୁହର ବନ୍ୟା
ଦୁଃସାଧ୍ୟ ରୋଗର ଶୀକାର ହୋଇଛି
କୁଳଚନ୍ଦ୍ରମା ଘରର ଭବିଷ୍ୟତ
ଡାକ୍ତରଖାନା ବିଛଣାରେ ପଡିଛି ସେ
ମୁମୂର୍ଷୁ ଅବସ୍ଥାରେ ପଡି ହେଉଛି ଛଟପଟ
ମଳିନ ନିସ୍ତେଜ ତାର ସର୍ବାଙ୍ଗ
ଚିକିତ୍ସାର ଅବହେଳା ତିଳେ ବି ନାହିଁ
ପାଣି ପରି ଖର୍ଚ୍ଚ ହେଉଛି ଅର୍ଥରାଶି
ତଥାପି ତା ଜୀବନର ନାହିଁ ଟିକିଏ ଆଶା
ଶତ ଉଦ୍ୟମ ରହିଛି ଜାରି
ସମସ୍ତଙ୍କର ଧାଁ ଦଉଡ ଏକ ଭରସାରେ
ହୁଏତ ବଞ୍ଚିଯିବ ହୁଏ ଯଦି କିଛି
ଈଶ୍ବରଙ୍କ ଅଲୌକିକ କରୁଣା
ପିତାମାତା ଆତ୍ମୀୟସ୍ବଜନ ଶୁଭାକାଂକ୍ଷୀ
ହୁଅନ୍ତି କେତେ ବ୍ୟତିବ୍ୟସ୍ତ
ସମସ୍ତେ ନିରୁପାୟ ନିରାଶ ହୋଇ
ଡାକନ୍ତି କେବଳ ପ୍ରଭୁ ପରଂବ୍ରହ୍ମଙ୍କୁ
ମାନସିକତାରେ ଭରି ଭକ୍ତିର ସମର୍ପଣ ଭାବ
ମାଆ ତା କରୁଛି ରୋଦନ
ମନାସି ନାନା ଉପହାର ମାଗୁଛି ଖାଲି
ପୁଅର ଆୟୁଷ ଫେରାଇ ଦିଅ ପ୍ରଭୁ
ମୃତ୍ୟୁଶଯ୍ୟାରେ ପଡି କରେ ଅନୁଶୋଚନା
ବିଗତ ଦିନର ବିଶୃଙ୍ଖଳିତ ଜୀବନ ତାର
ଯୌବନର ଆବେଗତାରେ
ଉଦ୍ଧତପଣେ କରିଛି ଯା ଯା ଅପକର୍ମ
ଅନୁତାପେ ଝରି ପଡୁଛି ଲୁହ ଧାର ଧାର
ମନେ ମନେ ମାଗୁଛି କ୍ଷମା କୃତ କର୍ମର
ନାହିଁ ଆଉ ସେ ଯୁବ ଉଦ୍ଦାମତା
ଧରାକୁ ସରା ମଣିବାର ଧ୍ରୃଷ୍ଟତା କି ଉନ୍ମାଦନା
ତାର କରୁଣ ପରିଣାମ ଭୋଗୀ ଭୋଗୀ
ନୀରବି ଯାଇଛି ମନର ଝଡ଼
ଭୟଙ୍କର ମରଣକୁ ଆଖି ଆଗରେ ଦେଖି
ଜଡ଼ ପାଲଟି ଯାଉଛି ତାର ଅବୟବ
ହାୟରେ ବିଧାତା ! କୃତ କର୍ମର
କି କରୁଣ କି ଦାରୁଣ ଜୀବନ ଯନ୍ତ୍ରଣା
ଭାବୁଛି ସେ ରକ୍ଷା ପାଆନ୍ତା ଯଦି ଥରେ
ସୁଧାରି ନିଅନ୍ତା ନିଜକୁ ଚାଲନ୍ତା ସୁପଥରେ ।
