ନୀଳ ପରୀର ନୀଳ କାହାଣୀ

ଶୁଣରେ ପିଲେ ପରୀ କାହାଣୀ

ଖୁସିରେ ମନ ଦେଇ

ଭାରି ସୁନ୍ଦରୀ ନୀଳ ପରୀ ସେ

ବୁଲଇ ଗୀତ ଗାଇ l

ପର ଯୋଡିକ ଭାରି ସୁନ୍ଦର

ସେଇ ପରୀର ଥିଲା

ଉଡ଼ି ଉଡ଼ିକା ନିଇତି ଆସେ

ମରତ ପୁରେ ଭଲା l

ତୁମରି ସାଥେ ଖେଳିବା ପାଇଁ

ବହୁତ ଇଚ୍ଛା ତା'ର

ବଣ ରାଇଜ ପାହାଡ଼ ନଈ

ସବୁଠି ତାର ଘର l

ସୁନ୍ଦର ଆମ ପରିବେଶକୁ

ପରୀଟି ଭଲ ପାଏ

ଗାଡ଼ି ମଟର କାଳିଆ ଧୂଆଁ

ଦେଖିଲେ ରୁଷି ଯାଏ l

ଛନ ଛନିଆ ଗଛ ପତର

ସବୁଜ ଶୋଭା ରାଶି

ଭାରି ପ୍ରିୟ ସେ ଆମ ପରୀର

ଦେଖିଲେ ଦିଏ ହସି l

ବୃକ୍ଷ ଲଗାଇ ଯତନ କଲେ 

ହସିବ ଆମ ଦେଶ

ନୂଆ ଜଙ୍ଗଲ କରିବା ସୃଷ୍ଟି 

ବଞ୍ଚିବ ପରିବେଶ l

ବୃକ୍ଷ କୁ ଆମେ କରିବା ବନ୍ଧୁ

ସବୁଠୁ ବଡ଼ ଧନ

ଖାଦ୍ୟ ଔଷଧ ସାଥୀରେ ପୁଣି

ଦେଉଛି ଅମ୍ଳଜାନ l

ତା' ପରି ଆଉ କିଏବା କାହିଁ

କରୁଛି ଉପକାର

ଚିର ନମସ୍ୟ ବୃକ୍ଷ ଆମର

ତା ପଦେ ନମସ୍କାର l

ନୀଳ ପରୀର ନୀଳ କାହାଣୀ

ମନରେ ରଖି ସଦା

ପ୍ରଣାମ କରି କରମ କଲେ

ନ ମିଳେ କେବେ ବାଧା l