ନବ ବିବାହିତା ପତ୍ନୀକୁ ଚିଠି

ଲେଖୁଚି ଏ’ ଚିଠି ଆଜି ତମ ଚିଠି ପାଇକି,

ଚିଠିଲେଖା ଏତେକଥା ଶିଖିଥିଲ କୋଉଠି ? । (ଘୋଷା)

 

ପାଞ୍ଚପଦ ପଚାରିଲେ ପଦେକଥା କୁହନା,

ଘରଲୋକ ଥିଲେ ପୁଣି ମୋତେ ଦେଖା ଦିଅନା ।

ମୋ ଦେହଟା ଭଲନାହିଁ ଯାଅ ମିଛ କହିକି ।

ଲେଖୁଚି ଏ’ ଚିଠି ଆଜି ତମ ଚିଠି ପାଇକି॥୧॥

ଲାଜ ଲାଜହେଇ କୁହ ମୁଁ ତ କିଛି ଜାଣେନା ,

ଜାଣିଗଲି ଆଜି ତମେ କରୁଥିଲ ବାହାନା ।

କୋଉଠୁ ପଢ଼ିଲ ପାଠ କେତେଟଙ୍କା ଦେଇକି ?

ଲେଖୁଚି ଏ’ ଚିଠି ଆଜି ତମ ଚିଠି ପାଇକି॥୨॥

ଗାଆଁ ଛାଡ଼ିଯିବି ନାହିଁ ଦେଖେଇଲ ଚାତର ,

ଏବେ ଚିଠିରୁ ଜାଣିଲି ତୁମେ ହୁଅ ଆତୁର ।

ପୂଜା ଛୁଟିରେ ଆଣିବି ଘରଭଡ଼ା ନେଇକି ।

ଲେଖୁଚି ଏ’ ଚିଠି ଆଜି ତମ ଚିଠି ପାଇକି॥୩॥