ନାରୀତ୍ବ

ନାରୀଟିଏ ହୋଇ ଜନ୍ମିବା କଣ ନୁହଁଇ ଯଥେଷ୍ଟ?

କାହିଁ ପାଇଁ ଲୋଡ଼ା ପୁଣି ତା'ର ନାରୀତ୍ବ ପୂର୍ଣ୍ଣତ୍ବ ?

ସଣ୍ଠଣା ଶୃଙ୍ଖଳାର ଗହଣାଗାଣ୍ଠିରେ ଚିରକାଳ ପଡିଛି ବନ୍ଧା

ତା'ର ଜୀବନ ଯାକର ତମାମ ସ୍ବାଧୀନତା ସ୍ୱାୟତ୍ତତା

ମାତୃତ୍ୱ ଲାଭର ଗୌରବ ଲୋଭନୀୟ ତ ନିଶ୍ଚିତ

ସଂସାରର ସବୁ ବୋଝ ବୋହିବା ତା' ପାଇଁ ଅନିବାର୍ଯ୍ୟ !

ଆଉ କେତେ ଦିନ ଏମିତି ଚିରାଚରିତ ଭେଳିକିରେ

ନାରୀଟିକୁ ଭଣ୍ଡେଇ ଚାଲିଥିବ ଏ ସଭ୍ୟ ଶିକ୍ଷିତ ସମାଜ?

ଲକ୍ଷ୍ମଣରେଖାର ଦେହଳୀରେ ହେଉଥିବ ତା'ର ଶୋଷଣ

ଚୁପ୍ ଚାପ୍ ସହିଯାଉଥିବ ସେ ସବୁ କିଛି ନିର୍ବିରୋଧରେ !

ବାରେ ତ ତାକୁ ଦେଖିବାକୁ ଦିଅ ସ୍ବପ୍ନ ଅସୁମାରି

ଉଡ଼ିବାକୁ ଦିଅ ଦୂର ସୁଉଚ୍ଚ ଗଗନରେ ମନ ଭରି

ଭାଷଣରେ ନୁହେଁ ବାସ୍ତବ ଜୀବନରେ ସହୃଦୟତାରେ

ଦେଖିବ ଧରା ପାଲଟିବ ଅମରାବତୀ ସଠିକ୍ ଅର୍ଥରେ ।