ନାମ ତୋ ପରମାନନ୍ଦ

କିଏ ଡାକେ ଧନ ଗୋରାଚାନ୍ଦ ନାମ

    କିଏ କୁହେ କଳାଚାନ୍ଦ

କିଏ ହୁଏ ଗୁଣି    ପୂର୍ଣ୍ଣଚାନ୍ଦ ପୁଣି

    କିଏ ମଣେ ପ୍ରେମ ଚାନ୍ଦ

ଧନରେ..... ସରି ନୁହେଁ କୋଟିଚାନ୍ଦ ।0।

ଚାନ୍ଦ ଉଇଁ ଥାଏ   ପୁଣି ଲୁଚି ଯାଏ

    ଆସେ ନାହିଁ କେଉଁ ଦିନ

ଅଖଣ୍ଡ ଦୀପର  ଜ୍ୟୋତିର ସମ୍ଭାର

    ଦିଶୁ ଥାଏ ତୋ ଆନନ

ଲଭେ ଏ ଜଗତ    ହୁଏ ବିହ୍ଵଳିତ

    ଲଭେ ଗୁପ୍ତ ମକରନ୍ଦ ।୧।

ଚାନ୍ଦରେ କଳଙ୍କ   ଦିଶେ ଜକ ଜକ

    କଳଙ୍କ ନାହିଁ ତୋ ପାଶେ

ତୋ ମୁଖରେ ଜ୍ୟୋତି ସଦା ବିରାଜନ୍ତି 

     ଲଭି ପ୍ରତି ପ୍ରାଣ ହସେ

ଜ୍ୟୋତିର୍ମୟ ତୁହି   ରହିଅଛୁ ଚାହିଁ

     ନାମ ତୋ ପରମାନନ୍ଦ ।୨।