ମଉନାବତୀ ମୋର କାନ୍ଦନା ଆଉ

ମଉନାବତୀ ମୋର କାନ୍ଦନା ଆଉ

ଲୁହଟା ଗାଲେ ଶୁଖି ଦିଶୁଛି ଛଉ ।

ମନର କଥା ଖୋଲି କହୁନ ପାଖ

ଆଖିରେ ରାଗ ରଖି କାମୁଡ଼ ନଖ

ସହିବି କେତେ କାଳ ତୁମରି ଦାଉ ।

ହେଲାଣି ଶେଜ ବାସି ବଢୁଛି ରାତି

ସପନ ଆଖି ନାହିଁ ଥରୁଛି ଛାତି

ସକାଳ ପାହିଯିବ ଡାକିବେ କାଉ ।

ଜିନିଷ ଚାହୁଁଥିଲେ ବରାଦ ଦେବି

ଖାଇବା ଇଛା ଥିଲେ ମଗାଇ ନେବି

ରୁଷିବା ଖଞ୍ଜ ଛାଡ଼ି ବୋଲିବା ହେଉ ।

ପରାଣ ସଖୀ ବୋଲି ଦେଇଛି ଡାକି

ରାଣକୁ ଖାଏ ପରା ଦେବିନି ଠକି

ଚେନାଏ ହସ ହସି ହୋଇଯା' ଲାଉ ।