ମୁହୂର୍ତ୍ତ
ମୁହୂର୍ତ୍ତ
କାହାଣୀ ଯଦିଓ ବିନା ଚରିତ୍ରରେ
ଅଲୋଡ଼ା ନୁହଁଇ ପୃଷ୍ଠା
ପୁଣି ନୂଆ ରୂପ ଦେଇ ଗଢି ହେବ
ସ୍ଵାଦ ହେବ ମିଠା ମିଠା ।
କେଉଁଠି ଝୁଲୁଛି ଆଖି ସାମନାରେ
ତାରିଖ ତିଥି ଓ ଦିନ
ଗରିବ ଘର କ୍ୟାଲେଣ୍ଡର ପୃଷ୍ଠାରେ
ପ୍ରାୟ ପର୍ବ ଘର ଶୁନ ।
ପ୍ରତିଦିନ ନୂତନ ନିର୍ମାଣ କାର୍ଯ୍ୟ
ହେଉଛି ପରିଲକ୍ଷିତ
ଶ୍ରମିକର ଦିନଚର୍ଯ୍ୟା ରେ ବିଶ୍ରାମ
ଦେଖାଯାଏନି ପ୍ରାୟତଃ ।
ଆଖିରେ ତଳକୁ ଦେଖିବା ବ୍ୟକ୍ତିର
ଅକାଳେ ଯାଏ ଜୀବନ
ହତ୍ୟା ପାଇଁ ଆବଶ୍ୟକ ମାରଣାସ୍ତ୍ର
ହୁଏନାହିଁ ପ୍ରୟୋଜନ।
ହୃଦୟରେ ଲୁଚି ଥିବା ସୁପ୍ତ ଭାବ
ଜିହ୍ୱା ଅଗ୍ରରେ ଜାଗ୍ରତ
ଗୁରୁଜନଙ୍କର ବିଚାର ସହିତ
ନୂଆ ପିଢ଼ି ବ୍ୟତିବ୍ୟସ୍ତ ।
ଅପରାଧ ଗୁପ୍ତ ରଖିବା ମଣିଷ
ଆନନ୍ଦେ ବୁଲେ ସର୍ବତ୍ର
କାହିଁକି ଦର୍ପଣ ଭିତରେ ହେଉନି
ହଟାତ୍ ପ୍ରତିବିମ୍ବିତ ।
ଆଖିରେ ଆଖି ମିଶେଇ କୁହା କଥା
ବିଶ୍ୱାସ ଯୋଗ୍ୟ ପ୍ରାୟତଃ
ପ୍ରେମ ପୂର୍ଣ୍ଣ ଓଠର ମହୁଲି କଥା
ଅସ୍ବୀକାର ଅନୁଚିତ ।
କାର୍ଯ୍ୟାଳୟ,ଚିକିତ୍ସାଳୟ ଓ ରାସ୍ତା
ରାଜନୀତି ବି ଅସ୍ଥିର
ବିବେକ ପାଇଁ ହିଁ ଆଦୌ ମିଳୁନାହିଁ
କେଉଁଠି ସ୍ଥିର ବଜାର ।
ଚକୋଲେଟ୍ ପାଉଡର ତେଲ ସାମ୍ପୁ
ସାବୁନ୍ ବି ଦରକାରୀ
ଖବର କାଗଜ ଆଉ ସାମ୍ବାଦିକ
କାହା ପାଇଁ ଦରକାରୀ ?
ପ୍ରତି ମୁହୂର୍ତ୍ତ ନିହାତି ମୂଲ୍ୟବାନ
ହେଉ ସଦ୍-ଉପଯୋଗ
ବିତି ଯାଇଥିବା ଅମୂଲ୍ୟ ମୁହୂର୍ତ୍ତ
ସ୍ମୃତି ରୂପରେ ସଜାଗ ।