ଶ୍ୟାମ ପ୍ରେମେ ଆକର୍ଷଣ

ଦୁଇ ଭକ୍ତଙ୍କର କଥୋପକଥନ

ଚର୍ଚ୍ଚାର ବିଷୟ ରାଧା

ସାରାଂଶ ରେ ଶ୍ୟାମ ଚରିତ୍ର ଜଡ଼ିତ

ଅଛି ପ୍ରେମ ପ୍ରୀତି ଶ୍ରଦ୍ଧା

ଗୋପପୁର ଭକ୍ତ ମୁଖରେ ବର୍ଣ୍ଣନା

ସଂକ୍ଷିପ୍ତ ଟିପ୍ପଣୀ ସହ

ଶ୍ରୀକ୍ଷେତ୍ରର ଭକ୍ତ କରୁଛି ଶ୍ରବଣ

ରାଧା ପାଦେ ରଖି ଲୟ 

ଶ୍ରୀକ୍ଷେତ୍ର ଭକ୍ତର ଉତ୍କଣ୍ଠା ପ୍ରଶ୍ନରେ

କହେ ଗୋପପୁର ଭକ୍ତ

ଶ୍ୟାମସୁନ୍ଦର ଙ୍କ ଅସରନ୍ତି କଥା

ଗୋପରେ ହୁଏ କଥିତ

ତନ୍ମଧ୍ୟରୁ ରାଧା ପ୍ରେମ କଥା ଭିନ୍ନ

ସ୍ଵତନ୍ତ୍ର ଭାବେ ବର୍ଣ୍ଣନ

କୁଳ ବଧୂ ହୋଇ ଶ୍ୟାମ ପ୍ରେମେ ବାଇ 

ଥିଲା ମୁଖ୍ୟ ଆକର୍ଷଣ

ଶ୍ରୀରାଧା ଅନନ୍ୟା ଅସୀମ ପ୍ରେମିକା

ଧରା ପୃଷ୍ଠେ ଜନ୍ମ ବେଳେ

ମୁଦ୍ରିତ ନୟନେ ଖୋଜୁଥିଲେ କୃଷ୍ଣ

ଅବଶ୍ୟ ହେଲା ସେ ବେଳେ

ଶ୍ୟାମ ଦୂର୍ବାଦଳ ଶ୍ରୀକୃଷ୍ଣ ସଂସ୍ପର୍ଶେ 

ରାଧା ପାଇ ଦୃଷ୍ଟି ଶକ୍ତି

ପୂର୍ବ ନିର୍ଦ୍ଧାରିତ ରହସ୍ୟ ଘେରରେ

ଥିଲେ ଯୁଗଳ ମୂରତି 

ଗୋପ ପୁରେ ନନ୍ଦ ଘରେ ରହି କୃଷ୍ଣ

ଗୋପ ଲୀଳା ରଚି ଥିଲେ

ଧେନୁ ଚରାଇବା ବାହାନା ସହିତ

ବଂଶୀ ମୂର୍ଚ୍ଛନା ତୋଳିଲେ

ଗୋପାଙ୍ଗନା ସହିତ ରାଧା ମୋହିତ

ସେଇ ବଂଶୀ ସ୍ୱର ତାଳେ 

କୁଳ ବଧୂ ରୂପେ ପରିଚିତ ରାଧା

ଲାଜ ସରମ ଛାଡ଼ିଲେ

କୃଷ୍ଣଙ୍କର ଠାଣି ବାଣୀ ଚାହାଣି ରେ

ନିଜକୁ ହଜାଇ ରାଧା

ହୃଦୟରେ ଶ୍ୟାମ ନାମ ମଧୁରତା 

ପ୍ରେମରେ ରଖିଲେ ଶ୍ରଦ୍ଧା

ଯମୁନା ଘାଟରେ ପୁଣି କେଳି କୁଞ୍ଜେ 

ରାଧା କୃଷ୍ଣଙ୍କ ମିଳନ

ନିନ୍ଦା ଅପବାଦ ସବୁ ଭୁଲି ରାଧା

ଶ୍ୟାମ ପ୍ରେମେ ହେଲେ ଲୀନ 

କ୍ରମେ ବଦଳିଲା ଦୃଶ୍ୟ କାଳ ବଳେ

କୃଷ୍ଣ ଛାଡ଼ି ଗୋପପୁର

ମଥୁରା ବିଜୟ ପରେ ଦ୍ୱାରିକା ରେ

ଖେଳ ରଚିଲେ ଅପାର 

ଝୁରୁଛି ରାଧିକା ଝୁରେ ଗୋପାଙ୍ଗନା 

ସର୍ବେ କୃଷ୍ଣ ଚେତନାରେ 

ଶ୍ୟାମ ଦୂର୍ବାଦଳ ମୋହନ ନାଗର

ଫେରିଲେନି ଗୋପ ପୁରେ

କାନ୍ଦୁ ଅଛି ରାଧା ଗୁମୁରି ଗୁମୁରି 

କହୁଛି ଅନ୍ତର କଥା

ଶ୍ୟାମ ରୂପ ,ରଙ୍ଗ, ତ୍ରିଭଙ୍ଗୀ ଚାହାଣୀ 

ଦର୍ଶନ ନିମନ୍ତେ ଚିନ୍ତା

ପ୍ରେମର ଆଧାର ଶ୍ରୀରାଧା ପ୍ରେମିକା

ସାକ୍ଷୀ ଯମୁନାର ଜଳ

ସାକ୍ଷୀ କେଳି କୁଞ୍ଜ,ସାକ୍ଷୀ ସହଚରୀ

ସାକ୍ଷୀ ଗୋପୀ ଓ ଗୋପାଳ

ଆକାଶକୁ ଚାହିଁ ଭାବୁଛନ୍ତି ରାଧା

ଆକାଶର ରଙ୍ଗ ନୀଳ 

ନୀଳ ତମାଳ ଓ ଯମୁନାର ଜଳ

କୃଷ୍ଣ ସ୍ଵୟଂ ରଙ୍ଗ ନୀଳ 

ପୁରୁଷ ପ୍ରକୃତି ମିଳନର ଗାଥା

ଆତ୍ମା, ଆତ୍ମା ସହ ଲୀନ 

ଶ୍ରୀରାଧା ମାଧବ ଏକ ଦିବ୍ୟ ଆତ୍ମା

ଅବିଚ୍ଛେଦ୍ୟ ଚିରାମ୍ଳାନ

ରାମ ଶ୍ୟାମ ରାଧେ ଶ୍ୟାମ ଶ୍ୟାମା ଶ୍ୟାମ

ନିତି ଭଜୁଛି ଶ୍ରୀରାଧା

କଳି କାଳେ ଭବ ଭୟ ନିବାରଣେ

ଭଜ ଶ୍ରୀରାଧା ଶ୍ରୀରାଧା

ଶ୍ରୀକ୍ଷେତ୍ର ଭକ୍ତର ଆଖି ଖୋଲି ଗଲା 

ଶୁଣି ଶ୍ରୀରାଧା କାହାଣୀ

ଶ୍ୟାମ ପ୍ରେମେ ଅଛି କେତେ ଆକର୍ଷଣ

ମନେ ହେଉଅଛି ଗୁଣି 

ଗୋପ ପୁର ଆଉ ଶ୍ରୀକ୍ଷେତ୍ରରେ

ଶୁଭେ ରାଧା ରାଧା ଡାକ

ଶ୍ୟାମ ଏବେ ନୀରବରେ ଶ୍ରୀମନ୍ଦିରେ

ଶୁଣୁଛନ୍ତି ଭକ୍ତ ଡାକ....।।