ମୁହିଁରେ ଯବାନ

ମୁହିଁରେ ଯବାନ ରଖିବି ସମ୍ମାନ

ଜୀବନ ବି ଦେବି ମୁହିଁ

କହୁଛି ମୁଁ ସତ କରିଛି ଶପଥ

ଜାତୀୟ ଧ୍ଵଜାକୁ ଚାହିଁ |

ଜୀବନର ରକ୍ତ ବିନ୍ଦୁ ଥିବା ଯାଏଁ

ଦେଶ ପାଇଁ ଲଢ଼ୁଥିବି

ଦେଶରେ ସୁରକ୍ଷା ପାଇଁକି ନିଶ୍ଚୟ

ନିଜକୁ ସମର୍ପି ଦେବି ।

ଶହୀଦ ଖବର ଯିବ ଯଦି ମୋର

ଝିଅକୁ ବୁଝେଇ ଦେବ

ମୁଣ୍ଡ ପିଟି କେବେ କାନ୍ଦିବନି ପ୍ରିୟା

ଦେଖି ଦେଇ ମୋର ଶବ ।

ସଲାମୀ ତୋପରେ ଶବ ମୋର ଯେବେ

ମଶାଣିରେ ଯିବ ଜଳି

ସେପାରିରୁ ଥାଇ ଖୁସି ହେବି ମୁହିଁ

ହୋଇ ଏ ଦେଶର ଧୂଳି ।

ଯଦି କେବେ କେହି ପଚାରେ ତୁମକୁ

ଗର୍ବ କରି କହୁଥିବ

ସ୍ଵାମୀ ମୋ ଜୀବନ ଦେଶ ପାଇଁ ଦେଲେ

ତାହା ହିଁ ତ ଗଉରବ ।