ମତ୍ସ୍ୟ ଅବତାର

ଜାଣେନା କାହିଁକି ଲାଗେ

ଆଜି ଏତେ ଅସ୍ଥିର

କାହିଁ କେଉଁ ପୁରୁଣା

ଅସିଆ କାଳର ମସିଆ

ଚରିତ୍ରସବୁ ନୃତ୍ୟରତ

ମୋ ମନର ଅପହଞ୍ଚ ଇଲାକାରେ

ରହି ରହି ଶୁଭେ

ନିଷ୍ଠୁର ନିୟତିର କ୍ରୂର ଅଟ୍ଟହାସ୍ୟ

ସତେକି ଗିଳିଯିବ ସମଗ୍ର ଦିଗବଳୟ କୁ

ଏମୁଣ୍ଡ ରୁ ସେମୁଣ୍ଡ ଯାଏଁ

ଦେଖିବନି ହୋଇଛି ଅବା ସୂର୍ଯ୍ୟୋଦୟ କି ସୂର୍ଯ୍ୟାସ୍ତ

କୁମେରୁ ରୁ ସୁମେରୁ ଯାଏଁ

ଗ୍ରାସିଯିବ ଘମାଘୋଟ ଅନ୍ଧକାର

ଦିଶୁଥିବ ଚତୁର୍ଦ୍ଦିଗ ଜଳାର୍ଣ୍ଣବ

ହୋଇଯିବ କି ମାଳିକା ବାଣୀ ସତ୍ୟ

ରହିଯିବ ସମୟ ର ଚକ

ଘଣ୍ଟା କଣ୍ଟା ଅଟକିଯିବ

ସମୟ ଟା ଲାଗିବ ସ୍ଥିର ନିଶ୍ଚିତ

ଯଦିଓ କାଳଟା ଯେ ପାଇଛି ବର

ସର୍ବଦା ଅଜର ଆଉ ଅମର

କାଳର ପାହାଚ ଡେଇଁ

ଓହ୍ଲାଇ ଆସିବେ ସ୍ୱୟଂ ନାରାୟଣ

ନେବେ ପୁଣି ମତ୍ସ୍ୟ ଅବତାର

ହେବ ପୁଣି ସ୍ଥିର ସମୟ ଅସ୍ଥିର ll