ମୋତେ ମିଳିଗଲା

ହୃଦୟରୁ ଭଲ ପାଉଥିବା ନିଜ

ପ୍ରିୟ ମଣିଷକୁ ଦେଖି

ଚୁପ କିଏ ଭଲା ରହି କି ପାରଇ

ଆଖି ରହିଯାଏ ଲାଖି ।

ଝରିପଡେ ଓଠୁ ସ୍ୱତ ମଧୁହାସ୍ୟ

ସୁମଧୁର ସମ୍ଭାଷଣ

ପଦୁଟିଏ ଶୁଣି ମନ ହୁଏ ଖୁସି

ବଢିଯାଏ ଆକର୍ଷଣ ।

ପ୍ରିୟ ମଣିଷଙ୍କ ଦରଶନ ଯୋଗ

ଅନ୍ତରଙ୍ଗ ମହୁରତ

ଭରିଦିଏ ମନେ ଆନନ୍ଦ ଉଲ୍ଲାସ

ବିଚ୍ଛେଦ ଦିଅଇ ଦୁଃଖ ।

ଆପଣା ଲୋକର ଲଭିଲେ ସାନ୍ନିଧ୍ୟ

ଲାଗେ ସବୁ ପ୍ରୀତିମୟ

ସଙ୍କଟେ ବିପଦେ ଥିଲେ ଯେତେ ଦୂରେ

ଲାଗେ ନାହିଁ ତିଳେ ଭୟ ।

ମୋ ପ୍ରିୟ ମଣିଷ ଅତି ଆପଣାର

ପାଶେ ମୋର ରହିଥିଲେ

ଲାଗେ କୋଟିନିଧି ମୋତେ ମିଳିଗଲା

କଥା ପଦେ କହିଦେଲେ ।