ମୋଡ଼ିଦେବି ତୋର କାନ

ଠୁକୁ ଠୁକୁ ହୋଇ ଚାଲୁଛୁ ଧନ,

ମୋହି ନେଉଅଛୁ ସବୁରି ମନ

ଛପି ଯାଉଅଛୁ କେଣେ

ତୋତେ କିଏ ଏଠି ଦେଖୁଛି ବୋଲିକି

ଲେଉଟି ଚାହୁଁଛୁ ଏଣେ ।

ଗୋପପୁର ସାରା ପଡ଼ୁଛି ହୁରି,

କରୁଛୁ ତୁ କାଳେ ଲବଣୀ ଚୋରି

ସଙ୍ଗେ ଘେନି ତୋର ସାଥୀ

ତୋ ନାଆଁରେ କେତେ ଅଭିଯୋଗ ଆସେ

ଆମରି ଘରକୁ ନିତି ।

କୋଳରେ ବସାଇ ସରାଗେ ଅତି,

ସର, ଲବଣୀ ମୁଁ ଖୁଆଏ ନିତି

ଥୁଉ ଥୁଉ କରି ଧାଉଁ

ସଖାଙ୍କ ଗହଣେ ମିଶି ଧୂଳି ଖେଳୁ

ଦାଣ୍ଡରେ ତୁ ଚାହୁଁ ଚାହୁଁ ।

ତୋ ଉପରେ ଥାଏ ନଜର ରଖି,

କାଳେ କି ସଙ୍କଟ ଆସି ଯିବକି

କେତେବେଳେ ଯାଉ କହ

ମୋ ରଙ୍କୁଣୀଧନ ମାଆ ମାଆ କହି

ଡାକୁଥାଉ ଅହରହ ।

ଏତେ କଥା ମୁହିଁ ପାରେନା ବୁଝି

ଅଭିଯୋଗ ଯଦି ଆସିବ ଆଜି

ମୋଡ଼ିଦେବି ତୋର କାନ

ପିତାଙ୍କ ଆଗରେ କହିଦେବି ସବୁ

ଥାଆ ତେଣୁ ସାବଧାନ ।