ମୋ ଶୂନଗାଡ଼ି

ଗାଡ଼ି ତ ଗାଡ଼ି ଦୁଇଚକିଆ ଆମରି ଶୂନଗାଡ଼ି,

ବସି ପଡ଼ିଲେ ବିନା ତେଲରେ ଆଗକୁ ଯାଏଗଡ଼ି |

ଘଣ୍ଟି ବଜାଇ ଟିଂ ଟିଂ ଟିଂ ଗଡୁଛି ସରସର,

ବ୍ରେକ ଅଛି ଦୁର୍ଘଟଣା କି କାହାକୁ ନାହିଁ ଡର |

ପରିବେଶକୁ ସୁରକ୍ଷା ଦିଏ ନାହିଁ ଧୂଆଁ କି ଧୂଳି,

ବଡ଼ ମଜାରେ ଯାଏ ସେ ଧୀରେ ହେଉ ବଜାର ଗଳି |

ରଖିବା ପାଇଁ ଲୋଡ଼ା ହୁଏନା ଗ୍ୟାରେଜ କି'ବା ଘର,

କାନ୍ଥ ପାଖରେ ଅଳପ ଜାଗା ତା' ପାଇଁ ଦରକାର |

ମରାମତିରେ ବେଶି ପଇସା ଖରଚ ହୁଏନାହିଁ,

ଅଜା ଚଲାନ୍ତି ମଜାରେ ତାକୁ ଆଈ ରହନ୍ତି ଚାହିଁ |

ଦିଦି ଚଲାଏ ସାଇକେଲକୁ ପଛରେ ବସେ ଭାଇ,

ଛକରେ ଯଦି ଲାଗେ କାଦୁଅ ମାଆ ଦିଅନ୍ତି ଧୋଇ |

ଆମରି ପ୍ରିୟ ସାଇକେଲଟି ଚଲାବୁଲାର ସାଥୀ,

ସାଙ୍ଗ ସହିତ ବୁଲିଲେ ଦିନ ମଜାରେ ଯାଏ ବିତି |