ମୋ ଘରଣୀ

ମୂଷା ପକାଇଲା ଦାଢ଼ି ତେଲକୁ,

ଛୁଟିପରେ ତୁମେ ଆସି ଘରକୁ

ପକାଇଲ ପାଦ ସେହି ତେଲରେ ଯେ

ପଡ଼ିଯାଇ ଥାପି ଦେଲ ହାତକୁ, ମୋ ଘରଣୀ ।

ଟେମ୍ପୁ ଡାକି ନେଲି ଡାକ୍ତରଖାନା,

କାମ କରିବାକୁ କଲେ ସେ ମନା

ଚଡ଼କ ପଡ଼ିଲା ମୁଣ୍ଡରେ ମୋର ଯେ

ରନ୍ଧାରନ୍ଧି କାମ ଦେବ ବେଦନା, ମୋ ଘରଣୀ ।

କରିଦେଲି ସିନା ସ୍କୁଲରୁ ଛୁଟି,

କରି ନ ଥିଲି ମୁଁ କେବେ ପାଇଟି

ଦେଖି ନ ଥିଲି ମୁଁ ରୋଷେଇ ଘର ଯେ

କେମିତି ସେକିବି ତାୱାରେ ରୁଟି, ମୋ ଘରଣୀ ।

ଷାଠିଏ ବରଷେ ରାନ୍ଧିଲି ଭାତ,

ଭାତ ଗାଲିବାରେ କଷ୍ଟ ବହୁତ

ହରଡ଼ ଡାଲିକୁ ପ୍ରେସର କୁକରେ

ରାନ୍ଧି ପଢ଼ିଲି ମୁଁ ସିଟି ଗଣିତ, ମୋ ଘରଣୀ ।

ମାଛ-ମାଂସ-ଅଣ୍ଡା ଭାରି ଆଦର,

ମସଲା ବାଟିବା ସପନ ମୋର

କଷିବା ରାନ୍ଧିବା ସିଟି ଗଣିବାକୁ

ଖାଇବିନି ପଛେ ନାହିଁ ମୋ ତର, ମୋ ଘରଣୀ ।

ତରକାରୀ-ଖଟା-ପଞ୍ଚଫୁଟଣ,

ହଳଦୀ-ମରିଚ ଦେଇଣ ଲୁଣ

କେମିତି ରାନ୍ଧିବି କଣ ବା' କରିବି

ଭାବି ଭାବି ମୋର ଅଧା ପରାଣ, ମୋ ଘରଣୀ ।

ବାପା-ମାଆ-ଭାଇ-ଭଉଣୀ-ଭାବି,

ଶିଖାଇ ପାରି ନ ଥିଲେ କେବେ ବି

ତୁମର ଧରମୁ ଶିଖୁଛି ରୋଷେଇ

ଖାଇବ ଆସ ମୁଁ ବାଢ଼ି ଯେ ଦେବି, ମୋ ଘରଣୀ ।