" ମୋ ଗାଁ-୩ "

ଗାଁଟି ମୋର ଗାଁ ପରିକା ଲାଗୁନି ଜମା ଆଉ

ଚକଚକିଆ ପିଚୁ ରାସ୍ତାରେ ଖସୁନି ଗୋଡ ଆଉ  

ବରଷା ହେଲେ ଝର ଫିଟୁନି ରଡୁନୀ ବେଙ୍ଗ ଆଉ 

ତଲାରୀ ଧରି ରଘୁ ମଉସl ଯାଉନି ଝାଡା ଆଉ  

ସକାଳୁ ଉଠି ଲଙ୍ଗଳ ଧରି ଯାଉନି ଚାଷୀ ଆଉ 

ସଞ୍ଜ ହୋଇଲେ ଗୋଠରୁ ଗାଇ ଫେରୁନି କାଇଁ ଆଉ  

କାଠ ବିକାଳୀ ଗୋଚ୍ଛା ମୁଣ୍ଡାଇ ଚାଲୁନି ଧାଡି ଆଉ 

ବିଲୁଆ ନନା ଗାତରେ ରହି ଡାକୁନି ହୁକେହୁଉ 

  

ଓଷା ପରବେ ଗାଁ ଦାଣ୍ଡରେ ଚିତା ପଡୁନି ଆଉ 

କାଲି ଆସିଛି ନୂଆବୋହୂଟା ଲାଜ କରୁନି ଆଉ 

ଟୁଙ୍ଗି ଘରରୁ ଭଜନ ଗାନ ଶୁଭା ଯାଉନି ଆଉ 

ପୋଖରୀ ତୁଠ ଖାଲି ପଡୁଛି ଯମୁନି ଖଟି ଆଉ  

ଓଡ଼ିଆ ଘର ପଖାଳ କଂସା ଦିଶୁନି ଜମା ଆଉ   

ଶ୍ରାବଣମାସେ ଶ୍ରାବଣ ଛତୁ ଫୁଟୁନି କାଇଁ ଆଉ  

କୃଷ୍ଣଚୁଡ଼ାର ରଙ୍ଗ ଦିଶୁନି ଵାସୁନି କିଆ ଆଉ 

କାଶତଣ୍ଡୀର ଶୋଭାରେ ମହି ମହକୁ ନାହିଁ ଆଉ  

ଆମ୍ବ ତୋଟାରେ କୋଇଲି ସ୍ୱର ଶୁଭୁନି ଜମା ଆଉ 

ଘର ଚଟିଆ ଘର ଚାଳରେ ବସା ବାନ୍ଧୁନି ଆଉ  

ମନ୍ଦିର ବେଢା ଭିତରୁ ଘଣ୍ଟ ଶୁଭୁନି କାହିଁ ଆଉ 

ହୁଳହୁଳିଟା ଶିଖେଇଲେ ବି ଶିଖି ହଉନି ଆଉ

 

ଗାଁରେ ନାହିଁ ଯାନୀ ଯନ୍ତlଳ ପୁନେଇ ପର୍ବ ଆଉ 

କୁସ୍ତି ଲଢେଇ ମରଦ ପୁଅ ଜିତୁନି ବାଜି ଆଉ 

ନ ଥାଉ ପଛେ ଏ ସବୁ କିଛି ଭାଇଚାରାଟି ଥାଉ  

ସବୁରି ମୁହେଁ ହସ ଫୁଟାଇ ମୋ ଗାଁଟି ହସୁଥାଉ ମୋ ଗାଁଟି ହସୁଥାଉ l