ମନର ମରମ କାହାକୁ କହିବ

ପର ଆସିଗଲେ ପକ୍ଷୀ ଉଡିଯାଏ

ବୁଝେନି ସ୍ନେହର ମୂଲ

କଲମରୁ ଯେବେ କାଳି ସରିଯାଏ

ଖାତା ଯେ କରେନି ଗେଲ ।

ସମୟର ଦ୍ୱାହି ଦେଇ ବଦଳଇ

ମଣିଷର ପରକୃତି

ଶିକ୍ଷା ସରିଗଲେ ଶିକ୍ଷକ ଅଜଣା

ଏହା ଆଧୁନିକ ନୀତି ।

ଲାଜର ଓଢଣା ହଜାଏ ଠିକଣା

ଆପଣାର ହେଇଗଲେ

ଭାବନାର ଅନ୍ତ ଆପେ ହୋଇଯାଏ

ଆବଶ୍ୟକ ସରିଗଲେ ।

ଅଜଣା ମଣିଷ ପରିଚୟ ନେଇ

ଆପଣାର ହେଇ ଯାଏ

ଜନମ ଦେଇଣ ବୃଦ୍ଧ ପିତାମାତା

ବୃଦ୍ଧାଶ୍ରମ ଖୋଜିହୁଏ ।

ବୟସ ବଢିଲେ ଠିକଣା ବଦଳେ

ଥିଲେ ତ ଟଙ୍କାର ଗଦା

ବିନା ପଇସାରେ ଜୀବନ୍ତ କାହାଣୀ

ରହିଯାଏ ଜାଣ ଅଧା ।

ନଈ ଚାଲି ଯାଏ ସାଗର ପାଖକୁ

ବୁଝେନି ପାହାଡ଼ ଦୁଃଖ

ମନର ମରମ କାହାକୁ କହିବ

ସଭିଏଁ ଖୋଜନ୍ତି ସୁଖ ।।