ମନର ମଣିଷ
ମନର ମଣିଷ
1 min
377
ମନଖୋଜେ ସିନା ମନର ମଣିଷ
ଜୀବନର ଚଲାପଥେ,
ଯାହାସାଥେ ବନ୍ଧା ଭାଗ୍ୟର ବନ୍ଧନ
ଯିଏ ଥିବ ସଦା ସାଥେ ।
ସୁଖ-ଦୁଃଖ,ହସ-ଲୁହର ସଂସାରେ
ଯିଏ ଦେବ ଆଶ୍ୱାସନା,
ମନର କୋହକୁ ବୁଝିନେଇ ଯିଏ
ଦେଉଥିବ ଯେ ସାନ୍ତ୍ୱନା ।
ଦୁନିଆଁର ଏଇ ରଙ୍ଗମଞ୍ଚପରେ
ଅଭିନୟ କରିବାକୁ,
ସାଥିଟିଏ ସିନା ଲୋଡ଼ାଅଛି ଏଠି
ସୁଖଦୁଃଖ ବାଣ୍ଟିବାକୁ ।
ହୃଦୟ ବେଦନା ବୁଝୁଥିବ ଯିଏ
ଆଖିକୁ ଆଇନା କରି,
ଧର୍ଯ୍ୟ ଓ ସାହସ ଦେଉଥିବ ନୀତି
ଭଲମନ୍ଦକୁ ବିଚାରି ।
ପାଶେ ରହିଥିବ ଛାଇପରି ଯିଏ
ରଖି ଅତୁଟ ବିଶ୍ୱାସ,
ସିଏ ସିନା ଅଟେ ନିଜଠୁ ନିଜର
ପ୍ରିୟ ମନର ମଣିଷ ।