ମନ କଥା କହିବି ତୁମକୁ

କୁଳୁକୁଳୁ ନାଦେ ପାହାଡି ଝରଣା

କାନେ କାନେ ଦିଏ କହି

ହସେ ଦୁଇ କୂଳ ତୀର ତରୁଲତା

ତଟିନୀଟି ଯାଏ ବହି ।

ଶୁଭେ କାକଳିର ମଧୁ ଗୁଞ୍ଜରଣ 

ସଙ୍ଗୀତ ମୃଦୁ ମୂର୍ଚ୍ଛନା

ଧରଣୀକୁ ଚୁମ୍ବେ ସୂରୁଜ କିରଣ

ଶୀତଳ ଚନ୍ଦ୍ରମା ଜ୍ୟୋତ୍ସ୍ନା ।

ତୋଳି ତା ମସ୍ତକ ଉଚ୍ଚ ଗିରିଶୃଙ୍ଗ 

ଆକାଶକୁ କିଛି କହେ

ତୁମ ଠାରୁ ଦୂରେ ଥିଲେ ପ୍ରିୟତମା

ଭାରି ଶୂନ୍ଯ କଷ୍ଟ ଲାଗେ ।

ଖୋଜେ ଅମାନିଆ ନିଃସଙ୍ଗ ମୋ ମନ

ତୁମକୁ ସାଥୀ ଏକାନ୍ତେ

ଜାଳିଦିଏ ହୃଦ ମଧୁର ଯନ୍ତ୍ରଣା 

ତୁମ ମୁହଁ ଖାଲି ଦିଶେ ।

ମଣେ ଅପରାଧୀ ନିଜକୁ ମୁଁ ନିଜେ

ନବୁଝି ଇଙ୍ଗିତ ଭାଷା

ଉଙ୍କିମାରେ ମନେ ତୁମ ଅଭିମାନ 

ଅନୁରାଗ ଆଡରୁଷା ।

ଦେଉଛି ତୁମକୁ କଥା ପ୍ରିୟତମା

ସମୟ ଲାଗୁ ପଛକେ

ମନଖୋଲି ସବୁ କହିବି ତୁମକୁ

ଲୁଚାଇବି ନାହିଁ ଟିକେ ।

ସ୍ମୃତିର ଶୂନ୍ୟତା ପ୍ରେମ ଗଭୀରତା

ଏକାକାରେ ହୁଏ ଦୂର

ଅନୁଭବେ ସତ୍ଯ ଜୀବନ ସାର୍ଥକ 

ସବୁଜ ଚିର ସୁନ୍ଦର ।