ମକର ସଂକ୍ରାନ୍ତି

ସୁରଜ୍ ଦେବତା ସବୁ ରାଶି ନ 

ମାସେ ମାସେ ଦିନ ରହେସନ୍,

ଗୁଟେ ରାଶି ନ ଆଉ ଗୁଟେ ରାଶି କେ ଗଲେ

ତାକେ ସଂକ୍ରାନ୍ତି କାଲ୍ କହେସନ୍।

ଯେନ ଦିନ ସୁରଜ୍ ଦେବତା

ମକର ରାଶିନ ଢୁକ୍ସନ୍,

ଆମର ଇନ ଲୁକେ ସେ ଦିନକେ

ମକର ସଂକ୍ରାନ୍ତି ବଲି ମାନସନ୍ ।

ହେ ଦିନ କହେସନ ପରେ ସୁରଜ୍ ଦେବତା

ତାଙ୍କର ପୁଓ ଘରକେ ବୁଲି ଯାଏସନ୍,

ଶନି ମାହାପୁରୁ ମକର ରାଶିର ଦେବତା

ବାପ ପୁଓ ଭେଟ୍ ହେସନ୍ ।

ଧନୁ ରାଶିନୁଁ ମକର କେ ଗଲେ

ତାଁକର ଉତ୍ତର ଆଡକେ ଢ଼ଲନ ଟିକେ ହେସି

ସେଥିର ଲାଗି ସବକୁ ଆମକୁ

ଦିନ ବଡ ଆଉ ରାଏତ୍ ଛୋଟ ଲାଗସି ।

ପୁରାନ କହେସି ଇ ଦିନକେ

ଭୀଷ୍ମ ଟାକି କରିଥିଲେ ,

ଭଲ ଦିନଟେ ଆଏଲା ବଲି

ସରଗ ଧାମ୍ କେ ଗଲେ।

ଇ ଦିନ ଗଙ୍ଗାକେ ସରଗନୁ ମର୍ତ୍ୟକେ

ଭାଗିରଥୀ ଆନିଥିଲେ,

ଭକ୍ତିର ଭାବେ ଖୁସ୍ ହେଇକରି

ଶିବର୍ ଜଟାନୁ ଝରିଗଲେ।

ମକର ସଂକ୍ରାନ୍ତି ଗୁଟେ ବଡ଼ ପରବ୍ ଆଏ

ଲାଗ୍ସି ବଢ଼େ ଖୁସି,

ଅଲଗା ଅଲଗା ରାଏଜ୍ ନ ଅଲଗା ନାଁଥି 

ମାନସନ ଭାରତବାସୀ।

ତାମିଲନାଡୁ ଆଉର୍ ପଣ୍ଡିଚେରୀ ନ

ଇଟାର ନାଆଁ ପୋଙ୍ଗଲ ହେଇଛେ 

ପଞ୍ଜାବ ସାଙ୍ଗେ ହରିଆଣା ରାଏଜ

ଲୋହରି ବଲି ମାନୁଛେ ।

ଆମର ଓଡ଼ିଶା ନ ମକର ସଂକ୍ରାନ୍ତି

ପୁଷ ସଂକ୍ରାନ୍ତି କହୁଛନ ବଙ୍ଗାଲି,

ବିହୁ ବଲିକରି ଅସାମେ ମାନ୍ସନ୍ 

ନଚାଡେଗା ହେସି ଗାଆଁ ଖୁଲି ।

ଆମର ସଂସ୍କୃତିର ଇଟା ଖୁସିର ପରବ

ଖାଏମା ଲଡୁ ରାଶି,

ଭାବ୍ ବଢ଼ାମା ମକର ବସମା

ସଭେ ନାଚମା ଡେଗମା ମିଲିମିଶି।

ଇ ଦିନ ସକାଳୁ ଗାଧି ବୁଡ଼ିକରି

ମକର ଭୋଗ୍ ଲଗାସନ୍ ସଭେ ,

ବଡ଼ ମାଏନ୍ତା ମାନ୍ କୁ ମୁଡ଼ିଆ ମରା ସାଙ୍ଗେ

ଦାନ୍ ଦପାନ ହେସି ଭକ୍ତିର୍ ଭାବେ।

ରାଜସ୍ଥାନ ଆଡ଼େ ପତାଙ୍ଗି ଉଡ଼।ସନ୍

ସବୁ ଲୋକେ ମିଶିକରି ,

ଖାଇବାର ମଜା ଇ ଦିନ ଖିଚଡ଼ି ସାଙ୍ଗେ

ମିଠେଇ ଆଉର କ୍ଷୀରି।

ଇ ଦିନ କର୍ଲେ ଦାନ ଦପାନ ସଂଗେ

ଜପ୍ ତପ୍ ଅନୁଷ୍ଠାନ,

ନିଜର ସାଙ୍ଗେ ଦେଶର ମଙ୍ଗଳ ହେସି

କଲେ ମହାପୁରୁ ଧ୍ୟାନ।

ସଂକ୍ରାନ୍ତିର ଖୁସିର ଦିନେ ଗୁରୁଜନ ମାଏନ୍ତା ମାନକୁ 

କରୁଛେଁ ମୁଇଁ ଜୁହାର ,

ମହାନ୍ ଆମର୍ ସଂସ୍କୃତି ପରମ୍ପରା

ଆମର ଗରବ୍ ଆମର ତିହାର ।