ମିଠା ମିଠା

ମିଠା ଲାଗେ ଭାରି ବର୍ଷାଭିଜା ରାତି

ବାଦଲ ଫାଙ୍କର ଜହ୍ନ

ମିଠା ମିଠା ଅତି ଶୀତ ସକାଳର

ପାହାନ୍ତା ପ୍ରହର ସ୍ବପ୍ନ

ମିଠା ଲାଗେ ମୋତେ ସାଧବ ବୋହୂର

ନାଲି ଟୁକୁ ଟୁକୁ ପାଟ

ମିଠା ଦିଶୁଥାଇ ରଙ୍ଗ ରଙ୍ଗିନ ସେ

ପରଜାପତିର ଛିଟ

ମିଠା ଲାଗେ ମୋତେ ଗାଁଆ ଝିଅଙ୍କର 

ବଉଳବେଣୀର ଗୀତ

ଜହ୍ନି ଓଷା ପୁଣି ଖୁଦୁରୁକୁଣୀକୁ 

ଦୋଳ ଗୋବିନ୍ଦଙ୍କ ଯାତ

ମିଠା ଲାଗେ ଭାରି ବୋଉ ହାତରନ୍ଧା

ମିଠା କାକରା ଆରିସା

ମିଠା ଲାଗେ ଭାରି ଜେଜେମାଙ୍କ ଗପ

ରିବନରେ ବନ୍ଧା ଖୋଷା

ମିଠା ଲାଗେ ମୋତେ ସାଗର କୂଳର 

ଲହଡିରେ ଭିଜା ବାଲି

ମିଠା ଲାଗେ ମୋତେ ଅଜାଙ୍କ ସାଥିରେ

ଯାତରା ଯିବାକୁ ବୁଲି 

ମିଠା ଲାଗେ ମୋତେ ମାମୁଁଙ୍କ ଆକଟ

ମାଇଁଙ୍କର ମିଠା ଗେଲ

ସ୍ନହବୋଳା ସେଇ ଆଈମା କାହାଣୀ

ମୋ ପାଇଁ ଅମୂଲ ମୂଲ

ମିଠା ଲାଗେ ମୋତେ ନାଉରି ଭାଇର

ମନମତାଣିଆ ଗୀତ

ଆଷାଢ଼ରେ ବର୍ଷା ବିଜୁଳି ସାଥିରେ

ବେଙ୍ଗ ଝିଙ୍କାରୀ ସଙ୍ଗୀତ

ମିଠା ଲାଗେ ମୋତେ ମନେ ପଡିଗଲେ 

ଗାଁଆଦାଣ୍ଡ ଧୂଳି ଖେଳ

ସ୍ମୃତିରେ ବତୁରା ବାଲ୍ୟ ଚପଳତା

ମିଠା ଲୁଚକାଳି ଖେଳ 

ମିଠା ମିଠା ଥିଲା ମିଛିମିଛିକା ସେ 

କଣ୍ଢେଇର ବାହାଘର

ସଢ଼େଇରେ ରନ୍ଧା ଭାତ ତରକାରୀ

ମିଛର ଘର ସଂସାର

ମିଠା ଲାଗେ ସବୁ ପିଲାଦିନ ସ୍ମୃତି

ଯୌବନର ଉପବନେ 

ଯୌବନ ବି ଦିନେ ସ୍ମୃତି ପାଲଟିବ

ବାର୍ଦ୍ଧକ୍ୟର ଆଗମନେ