ସପ୍ତପୁରୀ ଅମାବାସ୍ୟା

ବାର ମାସେ ତେର ପରବ ମଧ୍ୟରୁ 

ଅମାବାସ୍ୟା ଭାଦ୍ରବର 

ସପ୍ତପୁରୀ ପୁଣି କୁଶଗ୍ରହଣୀ ଯେ 

ଅନେକ ନାମ ତାହାର 

ଅଲାମଚଣ୍ଡୀଙ୍କ ମନ୍ଦିରରୁ ଆସେ 

ଭୋଗ ସପ୍ତପୁରୀ ତାଡ଼ 

କୁମ୍ଭାର ବିଶୋଇ ବିଜେ କରେ ଧରି 

ସାଥେ ଘଣ୍ଟ ଘଣ୍ଟା ମାଡ଼ 

ଷୋଡଶ ବିଧିରେ ସପ୍ତପୁରୀ ଲାଗେ 

ମହାପ୍ରଭୁଙ୍କର ପାଶ

ବନ୍ଦାପନା ସାଥେ ଆଳତୀ ସହିତ

ପୂଜା ଓ ନୀତି ଅଶେଷ

ଗୃହସ୍ଥ କରନ୍ତି କୁଶକୁ ସଂଗ୍ରହ 

ଧର୍ମ କାର୍ଯ୍ୟ ନିମିତ୍ତରେ

ସ୍ନାନ ଜପ ତପ ତର୍ପଣ କରନ୍ତି

ପିତୃଦେବ ଉଦ୍ଦେଶ୍ୟରେ

ଅମାବାସ୍ୟା ଦିନ ସୋମ କି ମଙ୍ଗଳ

କିମ୍ବା ହେଲେ ଗୁରୁବାର

ଅନୁରାଧା ସ୍ୱାତୀ ବିଶାଖା ଯୋଗରେ

କରେ ପାପ ତାପ ଦୂର

ମାଟିରେ ନିର୍ମିତ ଗୄହପୋକରଣ 

ପୂଜି ଥାନ୍ତି ଝିଅ ପିଲା

ପୁଅ ମାନେ ଟାଣି ମାଟି ଘୋଡ଼ା ହାତୀ 

ବୀରତ୍ୱ ଦେଖାନ୍ତି ଭଲା 

ସଂଯମ ସାଧନା ପାଇଁ ଏହି ଦିନ 

ହୋଇଥାଏ ସର୍ବ ଶ୍ରେଷ୍ଠ

ମାନସିକ ଶାନ୍ତି ହୁଅଇ ପ୍ରାପତ 

ଦୂରୀଭୂତ ପୀଡା କଷ୍ଟ ।।