Library
ମିଛ ସପନେ ଭାସୁନେ କି
ମିଛ ସପନେ ଭାସୁନେ କି
କାନନ କୁନ୍ତଳା ତଟିନୀ ମେଖଳା ରତ୍ନଗର୍ଭା ଅଟଇ
ମୋର ଏଇ ଭାରତ ମା'ଆ
ମାଟି ପାଇଁ ଡେଇଁ ପଡିଥିଲେ ବହୁ ନିଷ୍ଠାପର ବ୍ୟକ୍ତି
ଆମେ ବି ହୋଇବା ଠିଆ |୧|
ମନଟି ସୁନ୍ଦର ହୋଇଗଲେ, ସମାଜରେ ଏ ମଣିଷର
ଗୁଣ ଚନ୍ଦନ ଭଳି ବାସେ
ଅନ୍ୟ ଆକୃଷ୍ଟ ହବା ପାଇଁ ସୁନ୍ଦର ମନର ସେଥିପ୍ରତି
ଚିନ୍ତା କି ଯାଏ ଆସେ |୨|
ପ୍ଲାବନି ଉଠିଥିଲା ଦେଶ ପାଇଁ ସ୍ୱାଧୀନଚେତା ମଣିଷ
ମାନଙ୍କର ମନ ପ୍ରାଣରେ
ସାଉଁଟି ଆଣିଥିଲେ ସ୍ୱାଧୀନତାକୁ ନିଜ ଧମନୀର ଥିବା
କଞ୍ଚା ରକ୍ତର ପ୍ଲାବନରେ |୩|
ହେ, ଏକବିଂଶ ଶତାବ୍ଦୀର ବୁଦ୍ଧିଜୀବି ଓ ଯୋଗ୍ୟ ସମୂହ
ସହରୀ ସଭ୍ୟ ମଣିଷ ମନରେ
ଦେଶ ରାଜନୀତିରେ ଯାହା ଏବେ ଘଟୁଛି ତାହାକୁ ମଧ୍ୟ
ଗଭୀରତାର ସହ ଭାବୁଛେ କି ଥରେ |୪|
ମିଛ ସପନରେ ଆମେ ଘାଣ୍ଟି ହୋଇ ଖାଲି ଚାଲୁଅଛେ
ଉପରକୁ ବାହାକୁ ଫୁଲାଇ
କଥା ଓ କର୍ମକୁ ନକରି ଏକାକାର, ସତ କର୍ମ ଓ ସତ
ପଥ ଧରି ରଖିଛେ କି ଆପଣେଇ |୫|
ଆଜିର ଯୁଗରେ, ସରବେ ଯଦି କରନ୍ତେ ଗତି ଆମେ
ସବୁ ମଣିଷ ଗୋଷ୍ଠୀ
ନିଶ୍ଚୟ ଅସହାୟ ମନ ହୁଅନ୍ତା ଶାନ୍ତି ଦେଶରେ ଆମର
ସ୍ଥିତି ସଦା ରୁହନ୍ତା ତିଷ୍ଟି |୬|
ଦେଖ ଆଜି ମୋର ଯେତେ ଭଉଣୀ ଓ ଭାଇ, ତୁମର
ବିବେକ ଓ ନେତ୍ର ବିସ୍ତାରୀ,
ଦେଶ ସେବା ନାମରେ ନେତା ମାନେ ଆଜି ଖାଇଯାନ୍ତି
କିପରି ଆମ ଦେଶକୁ କୋରି |୭|
ଶାସନ କଳକୁ ଆବୋରି ନେତା କରନ୍ତି ସବୁ ଗଣହତ୍ୟା,
ଚୋରି, ରାମରାଜ୍ୟ କି ହେବ ସତ
ଅମଣିଷ ପଣିଆ ସର୍ବ, ଶାସନ କଳଠୁ ହୁଏ ଯେବେ ସୁରୁ
କିପରି ଗଡିବ ଦେଶର ପ୍ରଗତି ରଥ |୮|
ନେତାଙ୍କ ସରବ ଖଳ ପ୍ରକୃତି ଓ ସରବ ଛଟକ ନାଟକ
ଦେଖି ଭଟକୁଛି ଆମ ମନ
ସତକୁ ଛାଡ଼ି, ଧନଲୋଭ ଗରବ ଅହଁକାର ପଦ ମର୍ଯ୍ୟାଦା
ପାଇଁ କରୁ ବୃଥା ଆସ୍ଫାଳନ |୯|
ମରୀଚିକା ପଛେ ଗୋଡାଇଲା ପରି ଶେଷେ ମିଳୁଛି ଶୂନ୍ୟ
ହାଟେ ଖାଲି ନୃତ୍ୟେ ମଗନ
ସ୍ବପ୍ନ ଦେଖିବାଟା ଭୁଲ ନୁହେଁ କେବେ, ତେଣୁ ପ୍ରତ୍ୟେକ
ଭୋଟର ଦେଖୁଛେ ଦିବା ସପନ |୧୦|
ଆମ ଦୁର୍ଗତି ପାଇଁ ଆମେ ସରବେ ଦାୟୀ, ସେ ଅଟଇ,
ଆମ ମାନଙ୍କର ଉଦାସୀନତା
ନିର୍ଭିକ ନିଷ୍ଠାପର ବ୍ୟକ୍ତିଙ୍କର ଦାୟାଦ ହୋଇ ରକ୍ଷା କରି
ପାରିବାନି କି କଷ୍ଟ ଅର୍ଜିତ ସ୍ୱାଧୀନତା |୧୧|
ହେ, ଚେଇଁ ଶୋଇଥିବା ମଣିଷ, ଭାବୁଛ କି ଏ କଥାଟି
ଗହନ ନିଦର ସପନର ଏକ ରଜନୀ ଗଳ୍ପ
ଆଗାମୀ ପିଢ଼ିଙ୍କ ଭବିଷ୍ୟତ ପାଇଁ ଜାଗ ଯେତେ ଭାରତୀୟ
ଜାଗ ସୃଷ୍ଟି କର ନୂଆ ଚେତନାର ଚିତ୍ରକଳ୍ପ |୧୨|
ନିଜର ସ୍ବାର୍ଥର ଜୁଇରେ, ଜୀଇଁବାର ନିଶା ଯେତେ ବେଳେ
ଆଜି ହେଉଛି ପାଉଁଶ
ସତରେ କେଡେ ଅସହାୟ ଆମେ ଭୁଲି ସତ୍ୟ ଓ ଧରମକୁ
ପାନ କରୁଅଛେ ସର୍ବେ ଆଜି ହଳାହଳ ବିଷ |୧୩|
ମୃତ୍ୟୁ ପରେ ଲୋଡ଼ା ହେବ ଛ ଖଣ୍ଡ କାଠର ସଵାରୀ, କିଛି
ଖଇ କୌଡୀ ବିଞ୍ଛା ହେବ
ସମସ୍ତ ପରିଜନ ଥାଇ ପୁତ୍ର ଦେବ ମୁଖାଗ୍ନି ଅସ୍ଥି ପାଉଁଶ ଗଂଗା
ନଦୀ ଜଳେ ବିସର୍ଜନ ହେବ |୧୪|
ଚେଇଁ ଶୋଇବାରେ କଟିଗଲା ଏତେ ବରଷ, ଆମେ
ଅଣ୍ଟା ଭିଡି କିଛି କରି ପାରିଲେନି
ନହେଲା ନାଇଁ, ଆଗାମୀ ପିଢ଼ିଙ୍କ ଭବିଷ୍ୟତ ପାଇଁ ଆମେ
କ'ଣ ପଦେ ସତ କଥା କହି ପାରିବାନି ?? |୧୫|
