ମହା ଶିବରାତ୍ରି
ମହା ଶିବରାତ୍ରି
ଜାଳୁଛି ଜାଗର ତୁମ ପାଇଁ ପ୍ରଭୁ
ରହି ରାତ୍ରୀ ଉଜାଗର
ଜ୍ଞାନ ଆଲୋକ ରେ ହେଉ ଉଦ୍ଭାସିତ
ଏଇ ପ୍ରାଣପକ୍ଷୀ ମୋର l
ମନ ମନ୍ଦିରରେ ଆସ ଦେବଦେବ
କେବଳ ତୁମେ ହିଁ ତୁମେ
ମହାଶିବରାତ୍ରି ତୁମେହିଁ ଅତିଥି
ବେଳ ଯାଉ ତୁମ ନାମେ l
ହେ ଶିବଶଙ୍କର ଆହେ ଭୋଳାନାଥ
ଭୋଳାବାବା ହଂସନାଥ
ଏ ମାଟିର ପ୍ରାଣ ସୁଧା ଧାରା ସମ
ଝରେ ତୁମ ଆଶୀର୍ବାଦ l
ପୁଣ୍ୟ କାଠଯୋଡ଼ି ତୀରେ ବିରାଜିତ
ତୁମର ସେ ଭବ୍ୟ ଧାମ
ପରମହଂସ ର ଶକ୍ତିସ୍ଥଳ ତୁମ
ଖ୍ୟାତ ହଂସନାଥ ନାମ l
କୋଟିଏ ପ୍ରାଣର ଆରାଧ୍ୟଗୋ ତୁମେ
ଲକ୍ଷେ ହୃଦୟର ଆଶା
ମନ ଆଇନାରେ ପ୍ରତିବିମ୍ବ ତୁମେ
ସକଳ ପ୍ରାଣର ଭାଷା l
ଶୁଣି ଶୁଣାଉଛ ମଙ୍ଗଳ ବାରତା
ଶୁଭ 'ଓଁ'କାର ଧ୍ଵନି
ଖାଇ ଖୁଆଉଛ ଭକ୍ତ ଜନେ ଏଠି
ଅମୃତ ପ୍ରସାଦ ପୁଣି l
ଅନ୍ୟାୟ ପଥରେ ଅଗ୍ରଗତି ଯା'ର
ବାଧା ଦେଇଥାଅ ତାକୁ
ଅସତ୍ୟ ର ତୁମେ ଦୃଢ଼ ପ୍ରତିବାଦୀ
ନପଛାଅ ଦଣ୍ଡି ବାକୁ l
ପ୍ରଭୁ ପରଂବ୍ରହ୍ମ ଆହେ ତ୍ରିଲୋଚନ
ଦେବ ଦେବ ମହାଦେବ
ତଵ ଶ୍ରୀଚରଣେ ପଶିଲି ଶରଣ
ଦିବ୍ୟ ଦୃଷ୍ଟି ମୋତେ ଦେବ l