Library
Profile
ଅଧୁରା ସ୍ୱପ୍ନ
ଅଧୁରା ସ୍ୱପ୍ନ
ଅଧୁରା ସପନ
ଦର୍ଶନେ ମଗନ
ଆଜି ମୁଁ ଜୀବନ ପଥେ ।
ଅମୃତ ଲଗନ
ଉଦାସ ନୟନ
ଦେଖେ ସପନ ନିରତେ ।
ଫଗୁଣ ଫଗୁରେ
ଶ୍ରାବଣ ଝଡିରେ
ବଇଶାଖ ରଜନୀରେ ।
ସୁନୀଳ କାମନା
ଚାନ୍ଦର ଜୋଚ୍ଛନା
କଳପନା ନିଶାଘାରେ ।
ଜୀବନସପନ
ଦେଖେ ନିତିଦିନ
ସାର୍ଥକ କରିବାପାଇଁ ।
ଜୀଇଁ ଜୀଇଁ ମରେ
ଏଇ ଦୁନିଆରେ
ସତ୍ୟ କେବେ ହୁଏ ନାହିଁ ।
ପ୍ରିୟ ମୋ ଆସିବେ
ପ୍ରେମ ନିବେଦିବେ
ଆଖିରେ ଭରି ସପନ ।
ପ୍ରଣୟ ପାତ୍ରରେ
ମୋ ପ୍ରିୟ ଗାତ୍ରରେ
ଧ୍ଵନି ହେବ ମନମନ ।
ମୋ ପାପ ପୁଣ୍ୟର
ନଥାଏ ବିଚାର
ଅଧୁରା ସପନ ଶେଜେ ।
ସପନ ନାୟକ
ଖୋଜିବେ ଅନେକ
ମୋ ପାଦ ପାଉଁଜି ସାଜେ ।
ସପନର ଧାରେ
ଜୀବନ ପଥରେ
ମୋ ମନଟା ଉଡି ବୁଲେ ।
ଆଶା ଅସୁମାରୀ
କାମନା ପ୍ରସରି
ପ୍ରେମ ପାରିଜାତ ଫୁଲେ ।
ଶକତିରେ ଭରା
ସପନ ଅଧୁରା
ସ୍ମୃତି ଚିହ୍ନ ଛାଡି ଯାଏ ।
ଜୀଇଁବାର ନିଶା
କରେ ଲୋକହସା
ଯନ୍ତ୍ରଣାର ଲହୁ ପିଏ ।
ଅଧୁରା ସପନ
ମନରେ ଦହନ
ବିରହର ଗୀତ ଗାଏ ।
ଉନ୍ନିଦ୍ର ନୟନ
ପ୍ରେମିକ ବଦନ
ଅପଲକେ ଦେଖୁଥାଏ ।
ଆଶା କଳ୍ପବୃକ୍ଷେ
ସପନ ପ୍ରତ୍ୟକ୍ଷେ
କଅଁଳ କୁସୁମ କଳି ।
ପ୍ରଣୟ ଅମୃତ
ପାନରେ ଶାଶ୍ଵତ
ସୁଖ ପ୍ରାପ୍ତି ଥାଏ ମିଳି ।
ଜୀବନ ଆକାଶେ
ସପନ ବିକଶେ
ଆଶାର କିରଣ ବୁଣି ।
ଉଆଁସ ଅନ୍ଧାର
ହୋଇଯାଏ ଦୂର
ସ୍ଥାନ ସମୟକୁ ଜାଣି ।
ଆଙ୍କେ ଚିତ୍ରପଟ
ନମାନେ ଆକଟ
ପ୍ରେମବଂଶୀ ବାଜେ ଯେବେ ।
ନିଜ ଅଜାଣତେ
ଗଭୀର ନିଶୀଥେ
ଅଧୁରା ସପନ ଜାଗେ ।
ପ୍ରୀତି ସୁରା ପାନେ
ଅଧୁରା ସପନେ
ଜୀବନ ଅଧୁରା ଲାଗେ ।
ମତୁଆଲା ହୋଇ
ନିଜକୁ ହଜାଇ
ପ୍ରିୟତମେ ଚୁମା ମାଗେ ।
