ମାଉସୀ ମାଆ

ଭାଇ ଭଗ୍ନୀ ସହ କାଳିଆ ଠାକୁର

ଆଷାଢ଼ ମାସର ଦ୍ବିତୀୟା ତିଥି

ଗୁଣ୍ଡିଚା ମାଆର କୋଳକୁ ମଣ୍ଡନ

ରଥାରୁଢ଼ ହୋଇ ହରଷେ ଅତି ।

ସତେ ଜନ୍ମସ୍ଥାନେ ଖୋଜେ ପିଲାଦିନ

ମିଳଇ ମାଆର ହାତ ରନ୍ଧାରେ

ପିତା ଇନ୍ଦ୍ରଦ୍ୟୁମ୍ନ ଇଚ୍ଛାକୁ ପୂରଣ

ସୁସଜ୍ଜିତ ରହି ଜନ୍ମ ବେଦିରେ ।

ମହାଲକ୍ଷ୍ମୀଙ୍କର କଣ୍ଟ ପୂରା ପାଇଁ

ଫେରଇ ବାହୁଡ଼ା ଦଶମୀ ଦିନ

ଫେରିଲା ବାଟରେ ବଳଗଣ୍ଡିଠାରେ

ମାଉସୀ ମାଆକୁ ରଥେ ଦର୍ଶନ ।

ତା' ହାତ ତିଆରି ପୋଡ଼ପିଠା ଖାଇ

ମନେ ମନେ ସତେ ହୁଅଇ ତୋଷ

ଶବର ରାଜନ ବିଶ୍ଵାବସୁଙ୍କୁ ସେ

ସୁମରି ଫୁଟାଏ ଖୁସିର ହସ ।

ବିଶ୍ବାବସୁଙ୍କର ଥିଲେ କୁଳଦେବୀ

ଅର୍ଦ୍ଧାସନୀ ନାମେ ଏଇ ମାଉସୀ

ନୀଳମାଧବଙ୍କୁ ପୂଜେ ବିଶ୍ବାବସୁ

ଗପତେ ଗହନ କାନନେ ପଶି ।

ସେ ନୀଳମାଧବ ରୂପ ଜଗନ୍ନାଥ

କାଳାନ୍ତରେ ପ୍ରଭୁ କରି ଧାରଣ

ଗୁଣ୍ଡିଚା ମାଆଠୁ ମାଉସୀ ପର୍ଯ୍ୟନ୍ତ

କରନ୍ତି ସକଳ ଇଚ୍ଛା ପୂରଣ ।

ଶିଖାଇ ଦିଅନ୍ତି ସାରା ଜଗତକୁ

ମାଆ ପରି ମଧ୍ୟ ମାଉସୀ ପ୍ରିୟ 

ବନ୍ଧୁଜନ ପ୍ରୀତି ପ୍ରେମ ପତିପତ୍ନୀ 

ଭାଇ ଭଉଣୀଙ୍କ ଅତୁଟ ସ୍ନେହ ।