ମାଟିଘୋଡା

ସେଦିନ ଦେଖିଲି

ମନ୍ଦିରର ମାଟିଘୋଡା ସବୁ

ଚାଲିଯାଉଛନ୍ତି ବାହାରକୁ

ଶତଚେଷ୍ଟା ପରେ ବି

ମୁଁ କାହାକୁ ଅଟକେଇ ପାରୁନି

ଆଶ୍ଚର୍ଯ୍ୟ !! ଧର୍ମ କଣ ଏଇଆ??

ଏତିକି ବେଳେ...

କେହି ଜଣେ ପଛରୁ କହିଲେ

ଯିବାକୁ ଦିଅ ତାଙ୍କୁ

କେତେ ଦିନ ଆଉ ତୁମ

ଭୋଗ ଡାଲାରେ 

ଉଖୁଡା, କଦଳୀ, ନଡ଼ିଆ ଦେଖି

ଭୋକ ସମ୍ଭାଳି ଠିଆ ହୁଅନ୍ତେ

କେହି କଣ କେବେ ପଚାରି ବୁଝେ

ତାଙ୍କ କଥା... ମାନସିକ ପୁରିଲା ପରେ

ଯାଆନ୍ତୁ ସେମାନେ.. ନିଜ ପାଇଁ ଖୋଜି ନେବେ... 

ଆହାର ଟିକେ ....ଆଶ୍ଲେଷ ଟିକେ

ତୁମେ କଣ ଜାଣିନ !

ଅନ୍ନଦାତା ପରା ଏବେ ଧର୍ମଘଟରେ

ଭୋକରେ ଲଢ଼ୁଛନ୍ତି ରାଜରାସ୍ତାରେ

ଧର୍ମ କେମିତି ତେବେ...

ବାନ୍ଧି ହୁଅନ୍ତା ଘଟ ଗାଆଁରେ !!!