ମାଟି
ମାଟି
ଏଇ ମାଟି ଆମ ସାହାରେ ଭାଇ
ଏଇ ମାଟି ଆମ ସାହା
ଏଇ ମାଟି କୋଳ ଏନ୍ତୁଡ଼ି ଶାଳ
ଜୁଇର ଏ ଶେଷ ରାହା l
ଯେଉଁ ପଥ ଦେଇ ଆସିଥିଲେ ଦିନେ
ଚାଲିଯିବା ସେଇ ପଥେ
ଆମେ ସବୁ ପରା ମାଟିର ମଣିଷ
ମିଶିଯିବା ମାଟି ସାଥେ l
ମାଟି ହିଁ ଆମର ଜୀବନର ଭିତ୍ତି
ମାଟି ହିଁ ଆମର ପ୍ରାଣ
ମାଟି ବିନା ଏଠି ବଞ୍ଚିବା କେଉଁଠି
ତା' ବିନା ନାହିଁ ମରଣ l
ଏଇଠି ଜନମ ଏଇଠି ମରଣ
ଏଇ ମାଟି ଆମ ମା'
ତାହାରି କୋଳରେ ଜୀବନ ପାଇଛି
ବଞ୍ଚିବାର ଶେଷ ରାହା l
ତା' ପାଣି ପବନେ ଗଢ଼ା ଏ ଜୀବନ
ତା' ଶାକ ତଣ୍ଡୁଳ ଖାଇ
ଏ ମାଟି ପଡିଛି ଯୋଜନ ଯୋଜନ
ବିଶାଳ ବ୍ରହ୍ମାଣ୍ଡ ହୋଇ l
ଏ ମାଟି ବକ୍ଷରେ ସରିତ ସାଗର
ଯାଉଛନ୍ତି ବହି ନିତି
ତା' ବୃକ୍ଷ ଡାଳରେ ବିହଙ୍ଗେ ବସିଣ
ଗାଆନ୍ତି ମଧୁର ଗୀତି l
ତାହାରି ବକ୍ଷରେ ଦମ୍ଭ ସହକାରେ
ଭୂଧର ହୋଇଛି ଠିଆ
ଏ ମାଟିର ଗାଥା ଗାଉଛି ସଗର୍ବେ
ଫୁଲାଇ ତାହାର ହିଆ l
ଏଇ ମାଟି ଆମ ଜୀବନ ଜୀବିକା
ସହିଛି ସବୁରି ଅଳି
ଏ ମାଟିର ଧୂଳି ଅମୃତ ସମାନ
ମଥାରେ ଦିଅରେ ବୋଳି l