ମାଆ

ପୃଥିବୀଠାରୁ ତୁ      ଅଟଇ ମହାନ

    ମାଆ ରୂପେ ଜଗତମାତା,

ତୋହରି ଜଠରୁ   ଜନମି ମୁହିଁ ଯେ

    ହୋଇଛି ଏବେ ମୁଁ ମାତା ।

ଗରଭଧାରିଣୀ ମାଆ   ଲୋ ତତେ ମୁଁ

     କରୁଛି କୋଟି ପ୍ରଣାମ,

ତୋର ଆଶିର୍ବାଦେ   ଅଛି ମୁଁ ଭଲରେ

     ପ୍ରଣାମ ଘେନିବୁ ମମ ।

ଦୟା ଧର୍ମ ଆଉ    ସଂସ୍କାର ଶିଖେଇ 

      ଗଢିଛୁ ଜୀବନ ମୋର,

କ୍ଷମା ଧୈର୍ଯ୍ୟ ଆଉ   ଦାନ ଧର୍ମ ସବୁ

      ଅଟଇ ଗୁଣ ତୋହର ।

ଜୀବନକୁ ପାଣି    ଛଡେଇ ତୋହର

      ଜନମ ଦେଇଛୁ ମତେ,

ତୋ ଋଣ ସୁଝିବା   ‌ ନୁହଁଇ ସହଜ

     ଜନମ ନେବି ମୁଁ ଯେତେ ।

ରକ୍ତବିନ୍ଦୁ ତୋର  ମୋ ଦେହରେ ଖଞ୍ଜା

     ବିଦ୍ୟା ବୁଦ୍ଧି ଜ୍ଞାନ ରୂପେ,

ତୋର ସଂସ୍କାରରେ   ରହିବି ମଣ୍ଡିତା 

     ଥିବା ଯାଏଁ ଏଇ ଭବେ ।

ତୁହି ଅଟୁ ମୋର    ପ୍ରଥମ ଗୁରୁ ଲୋ

     ମୋ ପାଇଁ ତୁ ମହାଜ୍ଞାନୀ,

ଭଲମନ୍ଦ ତୁହି     ଯାହା ତ କହିବୁ

     ମଥାପାତି ନେବି ମାନି ।

ତୋ ସ୍ନେହ ମମତା   ଅମୂଲମୂଲ ଯେ

     ମୋ ପାଇଁ ଅଟେ ମହାନ,

ତୋ ପରିକା ସ୍ନେହ   ପାଇବି କେଉଁଠୁ

    ତୋ ପାଖରେ ମୋର ମନ ।

ଝରୁଥାଉ ସଦା    ଆଶୀର୍ବାଦ ତୋର 

     ମୋର ମସ୍ତକ ଉପରେ ,

ସବୁ ଦୁଃଖ ମୋର   କହି ମୁଁ ପାରଇ

    ଅନାୟାସେ ତୋ ପାଖରେ ।

ସୁସ୍ଥ ନିରାମୟ    ଜୀବନ ତୋହର 

      କାମନା କରୁଛି ମୁହିଁ ,

ଭଲରେ ବିତୁ ତୋ    ବାକିତକ ଦିନ 

      ଏତିକି କରିବ ବିହି ।