ମା ପାଇଁ ଫୁଲଟିଏ

ହୃଦୟ ବୃକ୍ଷରୁ   ତୋଳିଛି ମା ଲୋ

ତୋ ପାଇଁ ଗୋଟିଏ ପୁଷ୍ପ

ପୁଷ୍ପ ସଙ୍ଗେ ଅଛି  ମୋ ଆଖି ଜଳର

ଆତୁର ଆକୁଳ ବାଷ୍ପ ।

ମଉଳା ନୁହେଁ ଲୋ  ସଦ୍ୟ ପ୍ରସ୍ଫୁଟିତ

ସୌରଭ ରହିଛି ଭରା

କେତେ ଶରଧାରେ ଆଣିଛି ତୋ ପାଇଁ

ସାଜିବୁ ଜଗତେ ହୀରା ।

ନାଲି ମନ୍ଦାରକୁ  ତୋଳିଛି ମା ଲୋ

କଣ୍ଟକିତ ପଥେ ଯାଇ

ପାଦର ରୁଧିର  ପୋଛି ଦେବୁ ମୋର

ତୋହରି ଆଶିଷ ଦେଇ ।

ଝଡି ଶ୍ରାବଣରେ  ଦେଖି ଥିଲି ନେତ୍ରେ

ସର କୋଳେ ପଙ୍କଜିନୀ

ଆଶ୍ଵିନ ତିଥିକୁ ମନେ ରଖି ଥିଲି

ମଣ୍ଡିବେ ମୋ ଠାକୁରାଣୀ ।

ମୃତ୍ୟୁକୁ ନଡରି ଲମ୍ଫ କୁଦ ମାରି

ତୋଳିଲି ମୁଁ ସରସିଜ

ଆସ ମା ପାର୍ବତୀ ଜାଳେ ଆଶାବତୀ

ଯଜ୍ଞ ବେଦୀରେ ବିରାଜ ।

ଅପରାଜିତାକୁ ଚଢାଇବା ପାଇଁ

ଆଣିଛି ଜଗତଜିତା

ଶକ୍ତି ଧର୍ଯ୍ୟ ଦେଇ ସାଇତି ରଖିବୁ

ମିଳୁ ମୋତେ ତୋର ପତ୍ତା ।

ଶ୍ଵତ ରଙ୍ଗେ ତୁହି ଅତି ଆନନ୍ଦିତ

ଅର୍ପେ ମୁଁ ଟଗର ହାର

ହରିଦ୍ରା ରଞ୍ଜିତ ତୋ ଶୋଭା ବିଦିତ

ଘେନ ମାଗୋ କନିଅର ।

ସବୁ ତ ତୋହରି ସୃଷ୍ଟିର ସୌନ୍ଦର୍ଯ୍ୟ

କେଉଁ ଫୁଲ ଦେବି ତୋତେ

ମନ ଫୁଲଟିଏ ତୋଳିଲ ତୋ ପାଦେ

ରଖିବୁ ପ୍ରଫୁଲ୍ଲ ଚିତ୍ତେ ।

ପାର୍ବଣ ପରବେ ଆସ ମା ଗରବେ

ଧରା ପୃଷ୍ଠ ଦୁଃଖ ପାଇଁ

ସରାଗରେ ଯେଉଁ ଫୁଲ ଚଢାଇଲି

ଜଗତର ହିତ ସେହି ।