ଲେଉଟାଣି

ଅଭିମାନରେ ଜଡସଡ ଗୋଧୂଳି

ସାତସିଆଁ କନ୍ଥା ପରି

ଘରକୋଣରେ ପଡିଚି ଚୁପଚାପ୍

ଲେଉଟାଣିର ଆବେଗ ବି

ବେଶ୍ ଛଳନାଭରା

ସାତ ପରସ୍ତ ରଙ୍ଗବୋଳା ମୁହଁ ଭଳି

ଛାଟଖିଆ ବୋଦା ଭଳି

ଏକରକମ ଆଗକୁ ବଢ଼ିବାକୁ ନାରାଜ

ବାରମ୍ବାର ପଛକୁ ଫେରି ଚାହୁଁଚି

ଦୁଇ ପକେଟ୍ ଟୁଳଟୁଳ ଭର୍ତ୍ତି

ଠିକ୍ କୋଳିଗୋଟାଳି ପିଲାର ମୋହ ପରି

ଶୁଣି ପାରେନି ଲାଠିର ଠକ୍ ଠକ୍ ଶବ୍ଦ 

ହେଲେ ଲେଉଟାଣି ନିଚ୍ଛକ ବାସ୍ତବ

ସମସ୍ତ ନିଷ୍କ୍ରିୟତା ସତ୍ତ୍ୱେ ସମ୍ମୋହିତ ବାଳା ପରି 

ଅନୁଗମନ କରିବାକୁ ପଡେ ମୃତ୍ୟୁ କାପାଳିକର......।।।।