Library
ଲେଖା ପଛରେ ପ୍ରେରଣା
ଲେଖା ପଛରେ ପ୍ରେରଣା
ନିଃସର୍ତ୍ତ ନିଶବ୍ଦ ସିମାହୀନତାରେ
ଅନେକ ଦିନର ନିଃସଙ୍ଗତା ପରେ
ତୁମର ଆକସ୍ମିକ ଆବିର୍ଭାବ
ଯେମିତି ଶୂନ୍ୟ ମହଲରେ ବୁଣିଦେଇଛି
ନବୋଦିତ ଭାସ୍କରର ଆଦ୍ୟ କିରଣର ନୃତ୍ୟ
ସକ୍ରିୟ କରିଛି ସମସ୍ତ ଅଲରା ଭାବନାର ତରଙ୍ଗକୁ
ସ୍ୱତଃପ୍ରବୃତ ଭାବେ ହୃଦୟ ଗଳିରେ ଜାଗ୍ରତ ହୋଇଛି
ପ୍ରେରଣାର ଅଦୃଶ୍ୟ ତନ୍ମୟମାନ
କଳ୍ପନାର ବିବର୍ଣ୍ଣ ପଡିଆରେ ଭାବନାର ସବୁଜିମା
ତାକୁ ଶବ୍ଦର ରୂପ ଦେଇ ସଜେଇବାର ଦୁର୍ବାର ଅଭିଳାଷ
ମାତ୍ର ; ସମସ୍ତ ପ୍ରୟାସ ପରିଚୟ ହରାଇ ଧରାଶାୟୀ
କାରଣ ତୁମେତ ଅବର୍ଣ୍ଣନୀୟ
କିଛି ବର୍ଣ୍ଣମାଳାର ସମାହାରରେ ଆଉ ସୀମିତ ଭାବନାରେ ||
ତୁମ ପ୍ରେରଣାର ଊର୍ମି ଲହଡି ଭାଙ୍ଗୁଛି ହୃଦୟ ସିନ୍ଧୁରେ
ସମସ୍ତ ବିଷାଦକୁ ନିଶ୍ଚିହ୍ନ କରି ହୃଦୟେ ସଂଚାରିଛି ଅଭିନବ ସ୍ବପ୍ନ
ବିଶ୍ୱାସ ଆଉ ଭରସାର ସୁନୀଳ ଗଗନ
ସୁଯୋଗ ଦେଇଛି ନିଜକୁ ପୁନଃ ଆବିଷ୍କାର କରିବାର
ଆଜି କିଛି ଅକ୍ଷରର ସ୍ୱାଧୀନ ସଂଯୋଗ ଦେଉଛି ଆନନ୍ଦ ନିଜକୁ ପ୍ରକାଶ କରିବାର
କଲମର ସୁକ୍ଷ୍ମ ସ୍ପର୍ଶରେ ଆଙ୍କୁଛି ଅନେକ ଅଜଣା ଭାବନାକୁ
ଯାହାକି ଝଲସି ଉଠୁଛି ସହସ୍ର ସୂର୍ଯ୍ୟର ଉଦ୍ଭାସରେ
ଏତିକି କହିବି ଜଟିଳ ସମାଜର ଜଟିଳତା ମଧ୍ୟରେ ତୁମେହିଁ ମୋ ଲେଖା ପଛର ଏକମାତ୍ର ପ୍ରେରଣା ||
