ଲାଗୁଅଛି ଭାରି ଭଲ

ଆଉ ଟିକେ ଗେଲ କରିଦେ ଲୋ ବୋଉ

ଲାଗୁଅଛି ଭାରି ଭଲ ,

ତୋ କୋଳରେ ମିଳେ ସରଗର ସୁଖ

କିଏ ହେବ ତୋର ତୁଲ ।(ଘୋଷା)

ସେଦିନ ଜେଜେମା' କହୁଥିଲା ମୋତେ

ଆସିଥିଲୁ ସାଜି ବୋହୂ ,

ସଭିଙ୍କୁ ନିଜର କରି ନେଇଥିଲୁ

କଥାରେ ଝରାଇ ମହୁ ।

କୁଆଁ କୁଆଁ ରାବି ଜନମିଲି ଯେବେ

ତୋଳି ନେଲୁ କରି ଗେଲ ।(୧)

ତୋ କୋଳରେ ମିଳେ ସରଗର ସୁଖ

କିଏ ହେବ ତୋର ତୁଲ....

ସେନେହ ମମତା ଅଜାଡ଼ି ଦେଇକି

ଛୋଟରୁ କଲୁଣି ଏଡ଼େ ,

ଯା' ସହିତ ଯେଣେ ଯାଇଥିଲେ ବି ତୋ

କଥା ଭାରି ମନେ ପଡ଼େ ।

ଛାଇ ଭଳି ମୋର ପାଶେ ପାଶେ ଥାଉ

ପାଉ ତୋଠୁ ବେଶୀ ଭଲ ।(୨)

ତୋ କୋଳରେ ମିଳେ ସରଗର ସୁଖ

କିଏ ହେବ ତୋର ତୁଲ ।

ଆଉ ଟିକେ ଗେଲ କରିଦେ ଲୋ ବୋଉ

ଲାଗୁଅଛି ଭାରି ଭଲ.... ।