କୃଷ୍ଣ ବଳରାମ ବେଶ
କୃଷ୍ଣ ବଳରାମ ବେଶ
ଉପଗତ ହେଲା କୃଷ୍ଣ ତ୍ରୟୋଦଶୀ
ପବିତ୍ର ଭାଦ୍ରବ ମାସ
ଚାଲ ଦେଖିଯିବା ଶିରୀ ମନ୍ଦିରକୁ
କୃଷ୍ଣ ବଳରାମ ବେଶ ।
ଦେବୀ ଚତୁର୍ଭୁଜା ମହାମାୟା ବେଶେ
ଅଙ୍କୁଶ ପାଶକୁ ଧରି
ଅଭୟ ମୁଦ୍ରାରେ ଭଉଣୀ ସୁଭଦ୍ରା
ମଞ୍ଚେ ଥିବେ ବିଜେ କରି ।
ପ୍ରଭୁ ଜଗନ୍ନାଥ ଶ୍ରୀକୃଷ୍ଣଙ୍କ ବେଶେ
ଦିଶୁଥିବେ ମନୋରମ
ବାଙ୍କଚୂଳିଆର କିରିଟୀ ସାଙ୍ଗକୁ
ହସ୍ତରେ ବଇଁଶୀ ପଦ୍ମ ।
ନାକଚଣା ଖଡୁ ଚନ୍ଦ୍ର ଚିତା କଢି
କଦମ୍ବ ପତର ଫୁଲ
ପାହୁଡ଼ ପାଉଁଜି ବାଙ୍କି ଗୋଡ଼ମୁଦି
ଶୋଭୁଥିବ ଶ୍ରୀପୟର ।
ଭ୍ରାତ ବଳଭଦ୍ର ବାମ ହସ୍ତେ ପଦ୍ମ
ଦକ୍ଷିଣେ ଶିଙ୍ଘା ବାଜେଣୀ
କିରିଟୀ ଉପରେ ତୋଳିଥିବେ ଛତ୍ର
ବାସୁକୀ ଯେ ସପ୍ତଫେଣୀ ।
ନନ୍ଦ ବସୁଦେବ ଯଶୋଦା ଦେବକୀ
ଗୋପୀ ଗୋପାଳ ସହିତ
ବ୍ରହ୍ମା ଇନ୍ଦ୍ର ଦେବ ନାରଦ ରୋହିଣୀ
ରହିଥିବେ ଉପସ୍ଥିତ ।
କୃଷ୍ଣ ବଳରାମ ସୁବେଶ ଦର୍ଶନ
ବୃନ୍ଦାବନ ବିଚରଣ
ଦୃଶ୍ୟ ଅନୁପମ ଦିବ୍ୟ ଗୋଚାରଣ
ଲୀଳା ଶ୍ରୀପୁରୁଷୋତ୍ତମ ।
ହେବ ସନ୍ଧ୍ୟା ଧୂପ ପୂଜା ଅରଚନା
ବିଳମ୍ବିତ ଯାମିନୀରେ
ଧନ୍ୟ ହେଉ ପ୍ରାଣ ଜୀବନ ସାର୍ଥକ
ଦେଖି ସୁବେଶକୁ ଡୋଳେ ।